İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 444 Hüküm no: 680 Orijinal metin no: [80b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa vakfının gelirlerin Câbi Ali vakıf mütevellisine teslim edildiği Vilâyet-i Karaman’da Akşehir nâm kasabada vâki‘ merhûm Hasan Paşa Evkāfı’na bi’l-fi‘il mütevellî olan fahrü’l-akrân el-Hâc Abdi b. Mustafa meclis-i şer‘-i şerîfde, hâmilü’l-kitâb Yusuf b. Abdullah nâm kimesne mahzarında ikrâr ve takrîr-i kelâm edip, evkāf-ı mezbûreden olup vilâyet-i Rumeli’nde nefs-i Sofya’da vâki‘ kapan hanı ve kantâriyye ve şem‘ hânesinin câbisi olan el-Hâc Ali b. ( ) cibâyeti hasebiyle, zikr olunan kapan hanı ve kantâriyye ve şem‘ hâne mahsûlâtından bin yirmi yedi senesinde kabz eylediği otuz altı bin dört yüz akçeyi câbî-i merkūm mezbûr Yusuf yediyle bana irsâl edip, ben dahi tevliyyetimiz hasebiyle vakf-ı mezbûr için meblağ-ı mezbûru merkūm Yusuf yedinden bi’t-tamâm alıp kabz eyledim. Mezbûr câbî uhdesinde bir akçe ve bir habbe bâkī kalmadı dedikde, mütevellî-i mezbûrun ikrâr-ı meşrûhunu mezbûr Yusuf bi’l-muvâcehe tasdîk edicek, mâ vaka‘a bi’t-taleb ketb olundu. Tahrîren fi’l-yevmi’l-hâmis aşer min şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Mustafa b. İncekara Osman b. Ali, Osman b. Ali Dede, Osman b. Abdullah ve gayruhüm.