İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 444 Hüküm no: 681 Orijinal metin no: [80b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine’nin Sinan Beşe’de mehirden alacağı olduğu Mahmiye-i İstanbul’da Çırakçı mahallesi sâkinelerinden Emine bt. Ahî tarafından da‘vâ-yı âtiyyetü’z-zikre vekîl olup, nehc-i şer‘î üzre vekâleti sâbite olan Ahmed Beşe b. Abdullah nâm râcil meclis-i şer‘-i şerîfde, merkūme Emine’nin zevc-i mutalliki olan Sinan Beşe b. Abdullah nâm râcil muvâcehesinde vekâleti üzre da‘vâ edip, müvekkilem mezbûre Emine hâtunun mehr-i müeccelinden merkūm Sinan Beşe’nin zimmetinde beş bin beş yüz nakd-i fiddî râyic fi’l-vakt akçe hakkı vardır, suâl olunup vekâlet-i mahkiyem hasebiyle alıver[ilmesine] yemîn taleb ederim dedikde, gıbbe’s-suâl mezbûr Sinan Beşe ikrâr edip, fi’l-vâki‘ merkūm Emine’nin mehr-i müeccelinden zimmetimde edâsı lâzım üç bin ve mezbûrü’n-nukūd akçe hakkı vardır deyip ziyâdeyi münkir oldukda, vekîl-i mezbûrun ziyâdeye beyyinesi hâzıra olmamakla, merkūm Sinan Beşe’nin ikrârı mûcebince, üç bin akçeyi merkūm Emine’ye edâ ve teslîm taleb etmeğin, edâya tenbîh olundu. Mâ hüve’l-vâki‘ gıbbe’t-taleb ketb olundu. [Hurrire] fi’[t-târihi’]l-mezbûr. Şuhûdü’l-hâl: Ahmed b. Mahmud, Yusuf b. Ali, el-Hâc Ali b. Abdullah, Musa b. İsa ve gayruhüm.