İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 448 Hüküm no: 686 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Abdullah ile Mehmed b. Mustafa’nın câriye davasında anlaşma sağladığı Mahmiye-i İstanbul’da Sinan Paşa mahallesi sâkinlerinden Meryem bt. Abdullah nâm hâtun meclis-i şer‘-i şerîfde, hâmil-i hâze’l-kitâb Mehmed b. Mustafa nâm kimesne muvâcehesinde ikrâr ve takrîr-i kelâm edip, bundan akdem mezbûr Mehmed Eflakiyyetü’l-asl on beş bin akçe kıymetli Canfeda bt. Abdullah nâm câriye-i memlûkemi ayardup idlâl edip, kendi evinde birkaç gün haps ve gasb ettikden sonra nâ-bedîd ve ihlâk edip, câriye-i merkūmeyi mesfûr Mehmed’den taleb ettiğimde inkâr ile cevâb vermekle, mâbeynimiz[de] muhâsamât-ı adîde ve münâza‘ât-ı şedîde vâkı‘a olmuşdu. El-hâletü hâzihî müslihûn tavassutu [ile] câriye-i merkūme da‘vâsın inkârdan üç bini hâlen ve yedi bini müeccelen edâ olunmak üzre cem‘an on bin fıddî ve râyic fi’l-vakt akçe üzerine sulh teklîf ettiklerinde, ben dahi vech-i meşrûh üzre inşâ’-i sulh edip, üç bin akçesin meclis-i sulh-ı mezbûrde bi’t-tamâm mezbûr Mehmed yedinden ahz u kabz edip, yedi bin akçesine târih-i kitâbdan altmış gün tamamına te’cîl edip, mezbûr Mehmed dahi sulh-ı mezbûru kabûlden sonra zikr olunan câriyeye müte‘allik olan âmme-i da‘âvâdan mezbûr Mehmed’in zimmetin ibrâ-i âmm-ı hâtimü’n-nizâ‘ ile ibrâ etdim. Ba‘de’l-yevm asâleten ve vekâleten husûs-ı mezbûre müte‘allik da‘vâ sâdıre olursa, lede’l-hükkâmi’l-kirâm mesmû‘a olmaya dedikde, mukırra-i mezbûre Meryem’i ikrâr-ı meşrûhunda merkūm Mehmed bi’l-muvâcehe tasdîk ve bi’l-müşâfehe kabûl ve tahkīk edicek, mâ hüve’l-vâki‘ gıbbe’t-taleb ketb olundu. Tahrîren fî evâsıtı şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Mehmed Halife b. Bayezid el-imâm, Mustafa b. Abdullah er-râcil, Hacı Mustafa b. Abdullah, Mahmud b. Bâli, el-Hâc Ali b. Abdullah, Şaban b. Mustafa el-imâm ve gayruhüm.