İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 448 Hüküm no: 687 Orijinal metin no: [81b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Mehmed’in ödünçten, Makri’ v. Petro’ya borcu olduğu İşbu râfi‘ü’l-kitâb Makri v. Petro nâm zimmî meclis-i şer‘de mahmiye-i İstanbul’da Sinan Ağa mahallesi sâkinlerinden Ramazan b. Mehmed mahzarında üzerine da‘vâ edip, bundan akdem mezbûr Ramazan zimmetinde cihet-i karzdan râyic fi’l-vakt on bin yedi yüz yirmi akçe hakkım vardır. Hâlâ meblağ-ı mezkûru taleb ederim dedikde, gıbbe’s-suâl ve akībü’l-inkâr ve isre’l-istişhâd, udûl-i Müslimînden Ali Bölükbaşı b. Mustafa ve Receb b. Mahmud nâm kimesneler li ecli’ş-şehâde hâzırân olup istişhâd olunduklarında, fi’l-vâki‘ mezbûr Ramazan bizim huzûrumuzda mezbûr Makri’ye cihet-i karzdan üç bin yedi yüz yirmi akçe deynim vardır deyû ikrâr ve i‘tirâf etti. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde, şehâdetleri hayyiz-i kabûlde vâkı‘a olmağın, mûcebiyle meblağ-ı mezbûrun edâsına hükm olunup, mâ vaka‘a bi’t-taleb ketb olundu. Hurrire fi’l-yevmi’l-hâdî aşer min şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Mahmud b. Bâli, Mustafa b. Hamza, Mehmed b. Timur, Halil b. İbrahim.