İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 449 Hüküm no: 688 Orijinal metin no: [81b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Paşa’yı Atik Vakfı’ndan kahvehânenin Yusuf b. Abdullah’a kiralandığı Mahmiye-i İstanbul’da Murad Paşa mahallesi sâkinlerinden Mehmed b. Mehmed nâm kimesne meclis-i şer‘de, işbu râfi‘ü’l-kitâb Yusuf b. Abdullah mahzarında ikrâr ve i‘tirâf edip, mahalle-i mezbûrede merkūm Murad Paşa-yı atîk vakfından vâkıf-ı mezbûr hamamı kurbunda vâki‘, üç tarafı yine vakf-ı mezbûr ve bir tarafı tarîk-i âm ile mahdûd olan bir bâb kahvehâne icâre-i mu‘accele ve ayda otuz akçe ücret-i müeccele ile tasarrufumda idi. Hâlâ zikr olunan kahvehâneyi târih-i kitâbdan üç sene tamamına varınca yevmî yirmi beş akçe ücret-i mu‘accele ve ma‘rifet-i mütevellî-i vakf-ı mezbûr ile merkūm Yusuf’a îcâr etdim, ol dahi minvâl-i meşrûh üzre istîcâr ve kabûl etti. Ba‘de’l-yevm mâ[h] be mâh ücret-i mezbûreden bir akçesin cânib-i vakf-ı mezbûre, mâ‘adâsın bana edâ edip, müddet-i tamamına varınca mutasarrıf olsun dedikde, gıbbe’t-tasdîk mâ vaka‘a bi’t-taleb ketb olundu. Hurrire fi’l-yevmi’l-ışrîn min şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Ömer Bey b. Abdullah el-Bevvâb, Eyüb b. Mehmed, Ali b. Abdullah, Mehmed b. Eyüb.