İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 451 Hüküm no: 692 Orijinal metin no: [82a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Celep Dimo v. Yani’nin Ayşe bt. Yusuf’daki alacağını tahsil ettiği Celeb tâ’ifesinden Dimo v. Yani nâm tarafından meblağ-ı âti’z-zikri da‘vâ ve talebe ve sulh ve ibrâya ve bedel-i sulhu kabz ve îsâle vekîl olup, bimâ hüve nehcü’s-sübût şer‘an vekâleti sâbite olan Mehmed Beşe b. Abdullah nâm kimesne meclis-i şer‘de, işbu sâhibetü’l-kitâb Ayşe Hâtun bt. Yusuf tarafından tasdîk-i âtîye bimâ hüve tarîkü’s-sübût şer‘an vekâleti sâbite olan Fâtıma Hâtun bt. Yusuf mahzarında ikrâr ve takrîr-i kelâm edip, bundan akdem müvekkilim mezbûr Dimo’nun mersûme Ayşe Hâtun zimmetinde deyn-i şer‘îden dokuz bin sekiz yüz akçe hakkı olup, vekâlet-i mahkiyem hasebiyle da‘vâ ve taleb eylediğimde, ol dahi inkâr edip, beynimizde münâza‘ât-ı şedîde vâkı‘a olmuş idi. El-hâletü hâzihî beynimizde Müslimûn-ı muslihûn tavassut ile yedi bin nakd-i râyic fi’l-vakt akçe üzre akd-i sulh inşâ edip, bedel-i sulh olan meblağ-ı mezbûr yedi bin akçeyi müvekkilem merkūme Ayşe Hâtun yedinden vekâletim hasebiyle bi’t-tamâm ve’l-kemâl alıp kabz edip, zimmetini husûs-ı mezbûre müte‘allik da‘vâ ve talebden ibrâ etdim. Ba‘de’l-yevm husûs-ı mezbûra müte‘allik müvekkilimden bi’z-zât ve bi’l-vâsıta da‘vâ sâdıre olursa, lede’l-hükkâmi’l-kirâm mesmû‘a olmaya dedikde, gıbbe’t-tasdîk mâ vaka‘a bi’t-taleb ketb olundu. Tahrîren fi’l-yevmi’s-sâmin min şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Murad b. Mehmed, Mustafa b. Hamza, Hasan b. Mehmed, Yusuf b. Bayram, Halil b. İbrahim, Ali Bey b. Pir Dede el-Bevvâbü’s-sultânî, Mehmed b. Eyüb.