İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 454 Hüküm no: 699 Orijinal metin no: [83a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peymâne bt. Abdullah’ın, ölen eşi Mehmed b. Ahmed’in mîrâsından hissesini aldığı Mahmiye-i Kostantıniyye mahallâtından Şeyh Resmî mahallesinde sâkin iken fevt olan Mehmed b. Ahmed’in verâseti zevce-i metrûke ve vârisesi Peymâne bt. Abdullah ile li ebeveyn kız karındaşı Nisâ bt. Ahmed nâm hâtuna münhasıra olduğu mütehakkik oldukdan sonra mezbûre Peymâne mahfil-i kazâda merkūme Nisâ mahzarında takrîr-i kelâm ve ta‘bîr ani’l-merâm edip, mesfûr zevcim Mehmed’in muhallefâtından akār ve urûz ve nukūdda ve bi’l-cümle ism-i mâl ıtlâk olunur eşyâda alâ mâ farazallâhi te‘âlâ rub‘ hissemi bi’t-tamâm ve’l-kemâl alıp kabz eyledim, bir akçe ve bir habbe alacağım kalmadı. Ba‘de’l-yevm mezbûre Nisâ Hâtun’la husûs-ı mezbûra müte‘allik vechen mine’l-vücûh da‘vâ ve nizâ‘ım yokdur dedikde, mukırra-i merkūmenin [ikrârını] vech-i meşrûh üzre el-mukarru lehâ tasdîk edip, mâ vaka‘a [bi’t-taleb] ketb olundu. Hurrire fi’l-yevmi’s-sâdis min şehri Şevvâli’l-mükerrem li sene seb‘a ve ışrîn ve elf. Şuhûdü’l-hâl: Derviş b. Emrullah el-müezzin, Halil b. Emrullah, Ahmed b. Şahbaz, İbrahim b. Yahya, Hacı Ali Kethüdâ, Kadri [b.] Piyâle, Mahmud b. Mehmed ve gayruhüm.