İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 455 Hüküm no: 700 Orijinal metin no: [83a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen müteveffa İmre v. Yani’nin mîrâsının taksimi Mahmiye-i İstanbul’da Mirahor mahallesi sâkinlerinden olup bundan akdem mürd olan İmra v. Yani nâm zimmînin sulbiye sagīre kızı Roşan ve Turkadın nâm zimmîyelerin cânib-i şer‘den mansûb vasî[si] olan Papa Karagöz v. Kırlı meclis-i şer‘-i kavîmde, yine mürd-i mezbûrun zevcesi olan işbu râfi‘atü’l-kitâb Sultana bt. Mihal mahzarında ikrâr ve takrîr-i kelâm edip, bundan akdem muhallefât-ı mürd-i mezbûrdan mahalle-i mezbûrede vâki‘ bir tarafı İlya v. Tanrıvermiş mülkü ve bir tarafı İstemad v. ( ) mülkü ve bir tarafı tarîk-i âm ve bir tarafı tarîk-i hâs ile mahdûd olan menzili, zarûret-i deyn-i mürd-i mezbûr için vesâyetim hasebi ile mezbûre Sultana’ya râyic fi’l-vakt yirmi bin akçeye bey‘-i bâtla bey‘ ve teslîm edip, semeni olan meblağ-ı mezbûrdan emrimle mezbûre Seltan’a, yedi bin akçesini el-Hâc Mehmed vakfına [vakfı] mütevellîsi Ramazan b. Hüseyin nâm kimesneye, dört bin akçesini Attâr Kurd nâm kimesneye mürd-i mezbûrun deyn-i sebti için verip ve üç bin dört yüz akçesini yine mürd-i mezbûrun li ebeveyn kız kardeşleri ve vârisleri olan Güldalı ve Meryem nâm zimmîyelere hisse verip ve altı yüz akçesini mürd-i mezbûrun techîz ve tekfînine harc ve sarf edip, bâkī mezbûre Sultana zimmetinde beş bin akçe kalmış idi. Hâlâ vesâyetim hasebi ile meblağ-ı mezbûr beş bin akçeyi mezbûre Sultana yedinden sagīretân-ı mezbûretân için alıp kabz etdim. Menzil-i mezbûrun semeni olan meblağ-ı mezbûrdan merkūme Sultana zimmetinde bir akçe kalmadı dedikde, vasiyy-i mezbûru ikrâr-ı meşrûhunda mezbûre Sultana vicâhen tasdîk edip, mâ vaka‘a ketb olundu. Tahrîren fî evâili Şevvâli’l-mükerrem li sene seb‘a ve ışrîn ve elf. Şuhûdü’l-hâl: Mehmed b. Kemal, Hasan b. Ahmed, Mehmed Çelebi b. Emin, Mehmed b. Receb, Mehmed b. Ali el-imâm, Mehmed Çelebi el-müezzin, Mustafa b. Abdi, Hasan Çelebi b. Ahmed ve gayruhüm.