İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 456 Hüküm no: 702 Orijinal metin no: [83a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merdüm bt. Hacı Hasan’ın elindeki câriyenin Kerime bt. Keyvan’ın olduğu Mahmiye-i İstanbul mahallâtından Suhte Sinan mahallesi sâkinlerinden hâmiletü hâze’l-kitâb Kerime bt. Keyvan nâm hâtun mahfil-i kazâda, Bilecik’de Cuma mahallesi sâkinlerinden Merdüm bt. el-Hâc Hasan mahzarında üzerine takrîr-i da‘vâ edip, işbu hâzıra bi’l-meclis olan gök elâ gözlü açık kaşlı sarışın sin ve bâliğin yedi yaşı tahammülü olan Rûsiyyetü’l-asl Vildan nâm sagīre câriye mülküm olup, taht-ı tasarrufumda iken zâyi‘ olmuş idi. Hâlâ mezbûre Merdüm Hâtun’un yedinde buldum, bî-vech-i şer‘î tasarruf eder, suâl olunup câriyemden mezbûrenin yed-i âdiyesi def‘ ve bana teslîme emr olunmak matlûbumdur dedikde, gıbbe’l-istintâk mezbûre Merdüm Hâtun cevâbında, ben mezbûr Vildan’ı Bilecik nâhiyesinde esirci tâ’ifesinden Abdurrahman nâm kimesneden iştirâ eyledim, mülk-i müşterâmdır müdde‘iyye-i merkūmenin mülkü olduğu ma‘lûmum değildir deyicek, merkūme Kerime’den da‘vâsına muvâfık beyyine taleb olundukda, dergâh-ı âlî çavuşlarından Hasan Çavuş b. Mustafa ve Hüseyin b. Hüsam nâm kimesneler meclis-i şer‘-i şerîfe li ecli’ş-şehâde hâzırân olup, gıbbe’l-istişhâd fi’l-vaki‘, evsâf-ı mezbûre ile mevsûfe olan câriye-i merkūme müdde‘iyye-i mezbûrenin mülkü olup, târih-i kitâbdan bir sene mukaddem mülkünde ibâk etmiş idi. müdde‘iyye-i mezbûre Kerime’nin câriye-i mesfûreyi hakk-ı taleb ve ahz vardır. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, şehâdetleri ba‘de’t-ta‘dîl ve’t-tezkiye hayyiz-i kabûlde vâkı‘a oldukdan sonra, müdde‘iyye-i mezbûre mârrü’z-zikr câriyeyi bey‘ ve hibe ve tasadduk eylemeyip, vechen mine’l-vücûh ve sebeben mine’l-esbâb mülkünden ihrâc eylemediğine ba‘de’l-istihlâf salavâti’llâhi’l-aliyyi’l-a‘lâ etmeğin, câriye-i mezbûre müdde‘iyye-i mezbûre Kerime’ye hükm olunup, ketb olundu. Tahrîren fi’l-yevmi’s-sâdis min şehri Ramazâni’l-mübârek sene seb‘a ve ışrîn ve elf. Şuhûdü’l-hâl: Safer b. Subaşı? Mehmed, Ebûbekir b. Osman, Mehmed Bölükbaşı b. Hacı Ahmed, Bâli b. Mustafa el-müezzin ve gayruhüm.