İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 458 Hüküm no: 707 Orijinal metin no: [84a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslime Hâtun Vakfı eski mütevellisi İsmail b. Abdullah’ın zimmetine geçirdiği paranın tahsil edilmesi Mahmiye-i Kostantıniyye mahallâtından Molla Hüsrev mahallesi sâkinlerinden olup mahmiye-i mezbûrede merhûm Müslime Hâtun vakfına bi’l-fi‘il berât-ı pâdişâhî ile mütevellî olan Ali b. Mustafa mahfil-i kazâda, hâlâ merhûm Molla Hüsrev câmi‘inde imâm olup, bundan akdem vakf-ı mezbûre mütevellî olup, ba‘de’t-teftîş hiyâneti zuhûr ile azl olunan İsmail b. Abdullah mahzarında üzerine takrîr-i da‘vâ edip. Mezbûr İsmail muvakki‘-i kitâb olan hâkim-i câsim-i âlî-cenâb ve hüsnü me’âb-ı huzûr-ı alîlerinde, ale’t-tafsîl muhâsebesi görülüp, ekl ve bel‘ ve ketm ve itlâf ile üzerinde mâl-ı vakf-ı merkūmdan yirmi bin fıddî akçe zuhûr etti. Hâlâ vakf için taleb ettiğimde teslîmde ihmâl eder, suâl olunup zikr olunan mârrü’l-vasf yirmi bin akçe vakf için bana teslîm ettirilmesin taleb ederim dedikde, gıbbe’s-suâl mezbûr İsmail merkūm Ali’yi kelimât-ı meşrûhasında tasdîk edip, fi’l-vâki‘ ekl ve bel‘ ve itlâf ile vakf-ı mezbûr için zimmetine yirmi bin mârrü’n-nukūd akçenin alâ tarîki’t-tasmîm edâsı lâzım olduğuna tâyi‘an ve râgiben ikrâr edip, muhâsebesi hâkim-i mûmâ-ileyh -esbağallâhu te‘âlâ ni‘amehû aleyhi- huzûr-ı alîlerinde vâkı‘a olmağın, ma‘lûmları olduğu ecilden zikr olunan meblağı mütevellî-i vakfa teslîm ile ilzâm olunup, mâ vaka‘a ketb ü tahrîr olundu. Hurrire fi’l-yevmi’l-âşir min şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Mehmed Reis b. Zeynelâbidin, Ahmed b. Osman, Mustafa b. Abdullah, Şaban b. Ramazan.