İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 460 Hüküm no: 711 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İshak v. Yasef’in Komyanoz v. Flandet’teki alacağının kefîlinden tahsili Oldur ki Dârü’s-saltanati’s-seniyye mahmiye-i Kostantıniyye mahallâtından mahalle-i Ali Paşa sâkinlerinden olup Portakal cemâ‘atinden İshak v. Yasef nâm Yahudi meclis-i şer‘-i hatîrde, Rüstem Paşa Hanı’nda sâkin Duka v. Komyanoz nâm zimmî mahzarında tasdîr-i da‘vâ edip, bundan akdem Komyanoz v. Flandet nâm zimmîye seksen zirâ‘ mor çuka bey‘ eylemişdim. Beher zirâ‘ı üçer yüz akçeye, cem‘an yekûn dört bin akçe olur. Meblağ-ı mezbûra merkūm Duka emr ve kabûlü hâviye kefâletle kefîl olmuşdu. Hâlâ merkūm Komyanoz gaybet etmekle meblağ-ı mesfûru merkūm Duka’dan kefâlet-i mahkiyesi hasebiyle taleb ederim suâl olunsun dedikde, gıbbe’s-suâl merkūm Duka bi’l-mukābele inkâr edip, müdde‘î-i mezkûr İshak’dan sıdk-ı makāline muvâfık beyyine taleb olundukda, Aragon cemâ‘atinden Paroh v. Abraham ve İlyader cemâ‘atinden Mihayil v. Yakob ve İlyad v. Murdehay nâm Yahudiler meclis-i şer‘a li ecli’ş-şehâde hâzırûn olup, istişhâd olunduklarında edâ-i şehâdet-i şer‘iyye edip, fi’l-vâki‘ merkūm İshak mezkûr Komyanoz’a üçer yüz akçeye seksen zirâ‘ mor çuka bey‘ edip, meblağ-ı mezbûra mersûm Duka emr ve kabûlü hâviye kefâletle kefîl olup, bu husûsa şâhidleriz şehâdet dahi ederiz dediklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâki‘ olup, mûcebiyle hükm birle, mâ vaka‘a gıbbe’t-taleb kayd şüd. Tahrîren fî evâsıtı şehri Şevvâli’l-mükerrem sene seb‘a ve ışrîn ve elf. Şuhûdü’l-hâl: Mehmed b. Timur ve Eyüb b. Mehmed ve Mustafa b. Hamza ve Ahmed Baba b. Abdullah ve gayruhüm mine’l-huzzâr.