İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 461 Hüküm no: 712 Orijinal metin no: [84b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Yakub’un, ölen Mehmed’de alacağını varislerinden tahsili Mahmiye-i Kostantıniyye mahallâtından Mustafa Paşa mahallesi sâkinlerinden Ali b. Yakub nâm kimesne meclis-i şer‘de, yine mahalle-i mezbûre sâkinlerinden iken bundan akdem fevt olan Oruç nâm müteveffânın sagīr oğlu Mehmed’e kıbel-i şer‘den vasiyy-i mansûbu olan Abdülvehhâb b. Mustafa nâm kimesne mahzarında üzerine takrîr-i da‘vâ edip, bundan akdem müteveffâ-yı mezbûrun Hammâl Mehmed nâm kimesneye beş yüz akçe deyn-i müsbeti olup, taleb ettikde, müteveffâ-yı mezbûrun zevcesi Emine bt. Ahmed nâm hâtun benden karz vasiyy-i merkūm ve sâir veresenin emr u ma‘rifetiyle beş yüz akçe alıp, merkūm Hammâl Mehmed’e müteveffâ-yı mezbûrun deyni için vasiyy-i merkūmun emriyle teslîm edip, ba‘dehû taleb ettikde, meblağ-ı mezbûrun müteveffâ-yı mezbûrun muhallefâtından vasiyy-i merkūmun makbûzu olan meblağdan havâle-i sahîha-i şer‘iyye ile havâle edip, vasiyy-i merkūm kabûl etmişken, hâlâ imtinâ‘ eder, suâl olunup alıverilmek taleb ederim dedikde, gıbbe’l-istintâk vasiyy-i merkūm inkârıyla cevâb vermeğin, müdde‘î-i mezbûrun sıdk-ı makāline mutâbık beyyine taleb olundukda, udûl-i Müslimînden Cafer b. Şaban ve Durmuş b. Receb nâm kimesneler li ecli’ş-şehâde mahfil-i kazâya hâzırân olup, fi’l-vâki‘ müteveffâ-yı mezbûrun zevcesi mesfûre Emine Hâtun vasiyy-i merkūmun ve sâir veresenin emr u ma‘rifetiyle mezkûr Ali’den karz beş yüz akçe alıp, müteveffâ-yı mezbûrun deyn-i müsbeti için merkūm Hammâl Mehmed’e vasiyy-i merkūmun emriyle teslîm ettikden sonra meblağ-ı mezbûru müteveffâ-yı mezbûrun muhallefâtından vasiyy-i merkūmun makbûzu olan meblağdan havâle-i sahîha-i şer‘iyye ile havâle edip, vasiyy-i merkūm dahi kabûl etmişdi. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye etdiklerinde, ba‘de’t-ta‘dîl mezbûrânın şehâdetleri hayyiz-i kabûlde vâki‘ oldukdan sonra mûcibiyle hükm olunup, gıbbe’t-taleb bu hurûf ketb ü terkīm ve yed-i tâlibine def‘ ve teslîm olundu. Lede’l-hâce müzekkeri mâ cerâ ola. Tahrîren fî evâsıtı şehri Şevvâl li sene seb‘a ve ışrîn ve elf. Şuhûdü’l-hâl: Mahmud Efendi b. Abdi, Mahmud b. Selim, Mustafa b. Hamza, Zîver b. Mehmed ve gayruhüm.