Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 179 Hüküm no: 164 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çavuş’un Yeniçeri Elli üçüncü Ağabölüğü Vakfı Mütevellisi Şaban Odabaşı aleyhindeki menzil davasında anlaşma sağlanması Mahmiye-i İstanbul’da Kurşunlu Türbe kurbünde Kemâl Paşa mahallesi ahâlîsinden olup Dergâh-ı âlî yeniçerileri çavuşlarından Elli üçüncü Ağabölüğü’ne mahsûs odada çavuş iken bundan akdem Uyvar seferinde vefât eden Hüseyin Çavuş b. Ahmed’in sulbî kebîr oğlu ve hasren vârisi olan Ahmed Çelebi meclis-i şer‘-i şerîf-i enverde hâlâ oda-i mezbûrun vakıf orta akçeleri mütevellîsi olan işbu sâhibü’l-kitâb Şa‘bân odabaşı mahzarında ikrâr ve takrîr-i kelâm edip babam müteveffâ-yı mezbûr hâl-i hayâtında vakf-ı mezbûrun malından iki yüz elli esedî guruş istidâne ve kabz edip deyn-i mezbûr mukābelesinde mahalle-i mezbûrede vâki‘ inde’l-ahâlî ve’l-cîrân ma‘lûmü’l-hudûd büyût-ı adîdeyi hâvî mülk menzilini mütevellî-i mezbûr Şa‘bân Odabaşı yedine ba‘de’t-tahliyeti’ş-şer‘iyye bi-tarîkı’l-istiğlâl irhân ve teslîm eyledikden sonra meblağ-ı mezbûru kable’l-edâ babam mezbûr Hüseyin Çavuş fevt oldukda ben sagīr bulunmağla tesviye-i umûruma savb-ı şer‘-i mergūbdan vasî nasb olunan Abdurrahman Çelebi menzil-i merkūmu mesûğ-ı şer‘î boşken [yoğiken] semen-i mislinden noksân gabn-ı fâhiş ile bey‘ etmiş idi. Hâlâ ben bâliğ ve reşîd olup bey‘-i mezbûru mücîz olmadığıma binâen menzil-i mezbûru mütevellî-yi mezbûrdan da‘vâ ve taleb eylediğimde beynimizde münâza‘ât-ı kesîre vâkı‘a olmuş idi, el-hâletü hâzihi beynimize muslihûn tavassut edip da‘vâ-yı mezkûrumdan mütevellî-i mezbûr Şa‘bân Odabaşı beni altmış esedî guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûru mütevellî-i mezbûr yedinden tamâmen ahz u kabz edip husûs-ı mezbûra müte‘allıka cemî‘ da‘vâ ve mutâlebât ve eymân ve muhâsamâtdan mütevellî-i mezbûrun zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Recebi’l-mürecceb li-sene ihdâ ve semânîn ve elf. Şuhûdü’l-hâl: Veli b. Ahmed el-mübâşir, Mehmed Çelebi b. Memi? Yusuf b. ( ), el-Hâc Hasan b. Abdullah, Yusuf b. Ali.