Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 179 Hüküm no: 165 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un küçük oğlu Ahmed için tahsis olunan nafakanın yedi akçeye düşürülmesi Mahmiye-i İstanbul’da Arabacı Bayezid mahallesi sükkânından olup etibbâdan olan Fazlullah Çelebi b. Abdullah’dan vech-i âtî üzere istihbâr-ı şer‘î sudûrundan sonra mahmiye-i mezbûrede Hoca Hayreddin mahallesi sükkânından İbrahim Çelebi b. Hüseyin ve Simkeş mahallesi sükkânından Mustafa b. Şa‘bân ve Şeyh Resmi mahallesi sükkânından Pirkalemzâde demekle ma‘rûf umdetü’l-akrân Abdullah Efendi nâm kimesneler li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka müstahber-i mezbûrun zevce-i mutallakası olan Âişe bt. el-Hâc Mahmud nâm hatunun müstahber-i mezbûrun firâşından olup bi-hakkı’l-hıdâne hacr ve terbiyesinde olan sadrî sagīr oğlu Ahmed’in nafakası için müstahber-i mezbûr üzerine farz ve takdîr etdirdiği yevmî on akçenin yedi akçesinden ziyâdesi kadr-ı ma‘rûfdan ziyâde olduğunu haber verdiklerinden sonra meblağ-ı mezbûrun yevmî üç akçe hat olunup ba‘de’l-yevm sagīr-i mezbûr nafaka-i mefrûzası yevmî yedi akçe olmak üzere bu vesîka-i enîka ketb ü terkîm olunup yed-i tâlibe def‘ olundu. Fi’l-yevmi’r-râbi‘ min-Recebi’l-mürecceb li-sene ihdâ ve semânîn ve elf. Şuhûdü’l-hâl: Umdetü’l-akrân Mehmed Ağa b. Abdülmennan, el-Hâc Mustafa b. ( ), Hacı Ömer b. Abdullah, Mustafa Çelebi b. el-Hâc Ahmed, Çukadâr-ı Hazret Efendi.