İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 473 Hüküm no: 727 Orijinal metin no: [89b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kapıağası Mehmed’in işlettiği fırında beyaz ekmek pişirilmesine izin verildiği Kapı ağası tarafından. Akzâ kuzâti’l-Müslimîn evlâ vülâti’l-muvahhidîn ma‘denü’l-fazl ve’l-yakīn hüccetü’l-hakkı ale’l-halkı ecma‘în, vâris-i ulûmü’l-enbiyâ ve’l-mürselîn el-muhtas bi mezîdi inâyeti’l-meliki’l-mu‘în mevlânâ İstanbul Kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, mahmiye-i mezbûrede vâki‘ Çukurhamamı mahallesi sâkinlerinden olup, sâbıkan Mısır kadısı olan akzâ kuzâti’l-Müslimîn Mevlânâ Mehmed -zîdet fezâ’iluhu- ve mahalle-i mezbûrede olan ulemâ’-i izâm ve meşâyih-i kirâm südde-i sa‘âdetime mahzar gönderip, hâlâ kapı ağası olan mefâhirü’l-havâs ve’l-mukarrebîn ve mu‘temedü’l-mülûk ve’s-selâtîn Mehmed -dâme ulüvvühû-nun icâresinde olmağla, mahalle-i mezbûrede olup vakıf olan ekmek fırınında kırk elli yıldan berî beyaz ekmek işleyegelmiş iken, âhar fırınlarda ba‘zı fırın noksan üzre işlemeğe men olunup, mezbûr fırında dahi eksik işler kıyâs ile men‘ olunup, mahalle-i mezbûre a‘yânına gadr olmağla, zikr olunan fırında işleyenler noksan üzre işleyip kadîmden harcı ekmek narhından yirmi beş dirhem tefâvüt üzre kuzât-i sâbıkadan ellerinde olan temessükleri mûcebiyle mahalle-i merkūmede müddet-i medîde beyaz ekmek işleyip, ahâlî-i mezbûreye nâfi‘ olduğun bildikleri ecilden, kadîmden vech-i meşrûh üzre harcı ekmek narhından yirmi beş dirhem tefâvüt üzre beyaz ekmek işlenmek bâbında merhûm ve mağfûrun-leh Hudâvendigâr -tâbe serâhu- zamânında emr-i şerîf verilip, hâlâ tecdîd olunmak recâ etmeğin mukaddemâ verilen emr-i şerîf mûcebince amel olunmak emredip buyurdum ki, ( ) vusûl buldukda, bu bâbda vech-i meşrûh üzre verilen emr-i sâbık mûcebince amel edip, zikr olunan fırında kadîmden ne vechile beyaz etmek işlenigelmiş ise geri ol vechile beyaz ekmek işledip, hâricden kimesne min ba‘d dahl etdirmeyesiz. Şöyle bilesiz alâmet-i şerîfe i‘timâd kılasız. Tahrîren fî evâhiri şehri Cemâziyelâhir sene seb‘a ve ışrîn ve elf. Be makām-ı Kostantıniyye el-mahrûse.