İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 477 Hüküm no: 731 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Simon ve Ermiya’ya ait köylerin Boğdan Voyvodası tarafından zabtedilmesi Kıdvetü’l-ümerâ’i’l-milleti’l-Mesîhiyye umdetü küberâ’i’l-tâyifeti’l-İseviyye Boğdan voyvodası Radol voyvoda tevkī‘-i refî‘-i hümâyûnum vâsıl olıcak ma‘lûm ola ki, bundan akdem Ermiya ve Simon nâm karındaşlar Boğdan boyarlarından olup, ellerinde olan karyelerine mutasarrıflar iken vilâyet-i Boğdan’da mukaddemâ fetret oldukda, mezkûr Ermiya Boğdan voyvodası olup ve karındaşı mezbûr Simon dahi Eflak Voyvodası oldukda, ol karyeleri zabt ve tasarruf ederler iken Boğdan Voyvodası olan merkūm Ermiya kızların Leh beylerine vermekle Boğdan’dan tahsîl eylediği mâl ile kal‘alar ve köyler alıp ve karındaşı merkūm Simon dahi Eflak vilâyetinden aldığı mâl ile nice karyeler satın alıp ikisi bile mürd olduklarında avratları ve oğulları memâlik-i mahrûsede karâr etmeyip, Leh vilâyetinde aldıkları köylerine karâr eylediklerinde, Boğdan’da olan karyelerin ve kalelerin o zamân voyvoda bulunanlar vilâyet hizmetinde ve cizye tahsîlinde sa‘y ve istikāmet ile hizmet eden boyarlara verip, ile’l-ân bu vech üzre zabt olunup, mezbûrların mukaddemâ Leh vilâyetine varan avratları Leh’de olan köyleri ile kanâ‘at eylemeyip, bilâ izin Boğdan vilâyeti oğullarına zabt etdirmek için Leh askerin kaldırıp nice fesâda bâ‘is olmuşlar iken, bi inâyetillâhi te‘âlâ askerleri bozulup ve kendileri esîr oldukdan sonra mezbûr Simon’un oğlu Gavarlaş nâm zimmî Eflak vilâyetine tâlib olup, Âsitâne-i sa‘âdetime gelip ve anası ile’l-ân dârü’l-harbde Boğdan’a karîb iki günlük yolda otururken, mukaddemâ boyarlıkları zamânında zabt eyledikleri köyler babamız mülkleri idi deyû bu tarîkle Âsitâne-i sa‘âdetimden ol karyelerin zabtına emr-i şerîf ve mûcebince mektûblar alıp göndermekle, Boğdan içinde olan boyarlara ve re‘âyâya haber vardıkda cümlesi bir yere gelip, eğer bu tarîkle ol karyeleri onlar zabt ederler ise yine vilâyetimize Leh eşkiyâsı yeniden yol bulup, köyleri bahânesiyle evvelki gibi fesâda bâ‘is olıcakları mukarrer olduğundan gayrı, vilâyet-i Boğdan’dan vech-i meşrûh üzre kalan köylerine Âsitâne-i sa‘âdetimden hilâf-ı inhâ ile aldıkları evâmir-i şerîfeler ile zabt etdirilmemek ve Leh içinde varan âdemlerine min ba‘d alâka ve müdâhale etdirilmemek için bi’l-fi‘il südde-i sa‘âdetimden kapı kethüdân olan Kosta Kethüdâ tarafından arzuhâl sunulup, emr-i şerîfim recâ olunmağın, zikr olunan Gavarlaş’ın cânibinden ol karyeler zabtına varan adamları ve Leh’de olan anası tarafından dahi âdem gelirse, min ba‘d dahl ve taarruz etdirilmeyip, şimdiye değin zabt eylediği üzre kemâ-kân sen mutasarrıf olman emrim olmuşdur buyurdum ki ( ), vusûl buldukda bu bâbda sâdır olan emrim üzre amel edip, dahi mezbûr Gavarlaş’ın tarafından ol köyler zabtına varan adamların ve Leh’de olan anası tarafından dahi adam varırsa, min ba‘d ol karyelere dahl ve ta‘arruz ettirmeyip, şimdiye değin zabt edegeldiğin üzre kemâkân sen zabt ve tasarruf eyleyesin, inâd üzre olanları yazıp arz eyleyesin, şöyle bilesin alâmet-i şerîfe i‘timâd kılasın. Tahrîren fî evâili şehri Cemâziyelâhir li sene seb‘a ve ışrîn ve elf. Be makām-ı Kostantıniyye el-mahmiyye.