İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 476 Hüküm no: 730 Orijinal metin no: [90b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balat dışında mumculuk yapan Paros ve Apostoli’nin berâtlarının yenilenmesi Akzâ kuzâti’l-Müslimîn evlâ vülâti’l-muvahhidîn ma‘denü’l-fazl ve’l-yakīn vâris-i ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-mu‘în mevlânâ İstanbul kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, mahmiye-i mezbûre mahallâtından Balat hâricinde sâkin Paros ve Apostoli nâm zimmîler mukaddemâ Dersa‘âdet’ime gelip biz mumcu tâ’ifesinden olup Balat’ın taşrasında Piyâle nâm kasabın ve gayrilerin boğazladıkları davarın yağını biz satın alıp, mum işleyip âdet-i kadîm üzre füruht etmek için ibtidâdan bir dükkân vaz‘ ettiğimizde selhâne âmilleri ve sâir mumcular ve gayriler mâni‘ olurlar hayfdır deyû bildirdiler. Mezkûrlara mâni‘ olan kimesneler meclis-i şer‘-i şerîfe beraber edip göresin. Fî nefsi’l-emr mezkûrlar mumcular olup mahalle-i Balat hâricinde zikr olunan kasab ve gayride boğazlanan koyunun ve sâir davarların yağını satın alıp işlemek için ibtidâdan bir dükkân vaz‘ eylemeği mîrîye âid olan rüsûma zarar olmayıp dökdüğü mumu narh-ı rûzî üzre fukarâya ve sâir kimesnelere satıp, min ba‘d kimesne mâni‘ u muzâhim olmayıp tekrâr şikâyet olunmalı eylemeyesin deyû mukaddemâ emr-i şerîf verilip cülûs-ı hümâyûn-ı sa‘âdet-makrûnum vâki‘ olmağla, ol emr-i şerîf getirip tecdîd olunmasın recâ eyledikleri ecilden buyurdum ki, bu bâbda mazmûn-ı mesfûr üzre verilen emr-i şerîf mûcebince amel edip aslâ hilâfına rızâ ve cevâz göstermeyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis ve’l-ışrîn min şehri Recebi’l-mürecceb li sene seb‘a ve ışrîn ve elf. Be makām-ı Kostantıniyye el-mahrûse.