İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 479 Hüküm no: 734 Orijinal metin no: [91b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul, Galata ve Haslar kazalarının cizye, ispençe, bennâk türü vergilerinin Seyyid Hüseyin’e ihale olunduğu Efâzıl-ı kuzâti’l-Müslimîn e‘âzımu vülâti’l-muvahhidîn, menâbi‘u’l-fazl ve’l-yakīn, vârisûn-ı ulûmi’l-enbiyâ ve’l-mürselîn, hüccetü’l-hakkı ale’l-halkı ecma‘în, el-muhtassûn bi mezîdi inâyeti’l-meliki’l-mu‘în, el-hâkimûne’l-âdilûn bi kazâ-i İstanbul ve Galata ve Hâslar kadıları -zîde fazluhüm- tevkī‘-i refî‘-i hümâyûn vâsıl olıcak ma‘lûm ola ki, kazâ-i mezbûrînde vâki‘ cizye-i yava ve ispençe ve resm-i bennâk mukāta‘aları Seyyid Hüseyin nâm kimesnenin uhdesinde iltizâmda iken, Dergâh-ı âlî müteferrikalarından Murad Ağa’ya bin yirmi altı Ramazanı’nın on beşinde bir tarîkiyle ber vech-i emânet tevcîh olunup, bin yirmi yedi Saferi’nin on beşine gelinceye değin zabt ve tasarrufunda iken, dergâh-ı âlî çavuşlarından Hüseyin Çavuş mukāta‘aların iltizâm-ı sâbıkında tahvîli otuz yükde iken kırk bin akçe dahi ziyâde edip, cem‘an otuz yük ve kırk bin akçeye olur iltizâm ve kabûl eyleyip, berât dahi ihrâc edip, bin yedi Saferi’nin on beşinde sene-i mezbûre Cemâziyelevveli’nin on beşine gelinceye değin bu dahi zabt ve tasarruf üzre iken, hâlâ emîn-i sâbık Seyyid Hüseyin Divân-ı hümâyûna arzuhâl sunup, mukāta‘a-i mezbûr mahsûlünden mezkûr Emin Hüseyin Çavuş’un üç ay zamân-ı zabtından bir akçe teslîm olmayıp, hâlâ bu kulları zi’l-yed olup vukūfum olduğu cihetden, zikr olunan mukāta‘alar kendüye tekrâr ibkā ve mukarrer kılınmak için emîn-i sâbık Hüseyin Çavuş’un ta‘yîn ile hükm-i şerîfim taleb eylediğinde, tahvîline bir tahvîl dahi zam olunup, beher sene on ikişer yük akçeye iltizâm ve kabûl edip, hâlâ mevâcibe bir yük akçe ta‘yîn vermek üzre Seyyid Sa‘di ber vech-i kefâlet nâzır olmak üzre fermânım olmuşdur. Buyurdum ki, hükm-i şerîfimle vardıkda, bu bâbda sâdır olan fermânım üzre amel edip, ber vech-i ilzâm emîn olan Seyyid Hüseyin ve âdemlerine taht-ı kazânızda keferenin cizye-i yava ve ispençe ve resm-i bennâklarının resm-i mîrîlerini mu‘tâd-ı kadîm üzre zabt ve kabz etdiresin. Emîn-i sâbıkın âdemlerin ve âhardan bir ferdi vaz‘-ı yed ve müdâhale etdirmeyesin. Husûs-ı mezbûr ehem-i mühimmâtdandır. Malımın taleb ve cem‘-i tahsîlinde sa‘y-i mevfûr ve bezl-i makdûr olunup, sâire kıyâs eylemeyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’l-ışrîn min şehri Cemâziyelevvel sene seb‘a ve ışrîn ve elf. Be makām-ı Kostantıniyye el-mahrûse. Vasale fî 26 Cemâziyelevvel sene 1027.