İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 480 Hüküm no: 735 Orijinal metin no: [91b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İskender’in Bahadır b. Hızır’dan üç talâkla boşandığı Mahmiye-i İstanbul’da Arabacı Bayezid mahallesi sâkinelerinden işbu râfi‘atü’l-kitâb Fâtıma bt. İskender nâm Hâtun meclis-i şer‘de zevci olan Bahadır b. Hızır nâm râcil mahzarında üzerine da‘vâ edip, mezbûr Bahadır zevcim olup, bundan akdem eğer şürb-i hamr edersem benden zevcem mezbûre Fâtıma talâk-ı selâse ile mutallaka olsun deyû şart edip, ba‘dehû şürb-i hamr edip, mezkûr bulunmak ile talâk-ı selâse vâki‘ olup, hâl minvâl üzre olduğuna ikrâr dahi etmiş iken, yine üzerime dâhil olup mu‘âşeret taleb eder. Suâl olunup duhûlden men‘ olunmak matlûbumdur dedikde, gıbbe’s-suâl ve’l-inkâr ve isre’l-istişhâd, udûl-i Müslimînden Seyyid Mahmud b. Mehmed ve Ali b. Mehmed el-imâm ve Abdülazîz b. Mehmed el-müezzin ve Mehmed b. Murad nâm kimesneler meclis-i şer‘a hâzırûn olup, fi’l-vâki‘ mezbûr Bahadır bizim huzûrumuzda min ba‘d şürb-i hamr ve şürb-i arak edersem avratım mezbûre Fâtıma selâsen mutallaka olsun deyû şart edip, ba‘dehû şürb-i hamr edip, şart bulunmak ile talâk-ı selâse vâkı‘a oldukdan sonra ve yine dâhil olduğuna ikrâr eyledi. Bu husûsa şâhidleriz, şehâdet dahi ederiz deyû edâ-yı şehâdet-i şer‘iyye etdiklerinde, ba‘de’t-ta‘dîl şehâdetleri hayyiz-i kabûlde vâkı‘a oldukdan sonra, mezbûr Bahadır müdde‘iyye-i mezbûre ile mu‘âşeret-i zevciyyetden men‘ olunup, mâ vaka‘a bi’t-taleb ketb olundu. Hurrire fî evâsıtı şehri Şevvâli’l-mükerrem sene seb‘a ve ışrîn ve elf. Şuhûdü’l-hâl: Ahmed b. Abdullah, Yusuf b. Bayram, Mustafa b. Hamza, Hızır b. Halil, Abdurrahman b. Süleyman.