İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 106 Hüküm no: 13 Orijinal metin no: [1a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Mehmed’in Mustafa b. Mehmed’de olan alacağı <> Fi’l-asl vilâyet-i Rumeli’nde Gelibolu muzâfâtından Rumeli Hisarı ahâlîsinden Ahmed b. Mehmed nâm kimesne meclis-i şer‘de Mustafa b. Mehmed mahzarında ikrâr ve takrîr-i kelâm edip mezbûr Mustafa zimmetinde cihet-i karz-ı şer‘îden üç bin sekiz yüz altmış akçe hakkım olup meblağ-ı mezbûru merkūm Mustafa’dan da‘vâ ve taleb eylediğimde beynimizde münâza‘ât ve muhâsamât-ı şedîde vâki‘a olmuş idi. El-hâletü-hâzihi yine vesâtet-i muslihîn ile da‘vâ-yı mezkûremden mezbûr Mustafa benimle iki bin sekiz yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr iki bin sekiz yüz akçeyi merkūm Mustafa yedinden tamamen ahz u kabz ve mâ‘adâdan zimmetini ibrâ eyledim. Ba‘de’l-yevm mezbûr Mustafa kıbelinde vechen mine’l-vücûh ve sebeben mine’l-esbâb hak ve alâkam kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Recebi’l-ferd li-sene isneyn ve seb‘în ve elf. Şuhûdü’l-hâl: (…), Mustafa Çelebi b. Mumcu, Mustafa Çelebi mumcu, Abdullah Beşe b. Kapıkethudâsı, Receb Beşe kethudâ, Berber Osman Beşe, Ahmed Beşe vezneci.