İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 108 Hüküm no: 17 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehemmed’in kocası Lütfullah Çelebi b. Mustafa üzerine açtığı alacak davasından men olunduğu Mahmiye-i İstanbul’da Cafersubaşı mahallesinden Âişe bt. el-Hâc Mehemmed meclis-i şer‘de hâlâ zevci işbu bâ‘isü’l-vesîka Seyyid Lütfullah Çelebi b. Mustafa mahzarında üzerine takrîr-i da‘vâ edip mukaddemâ mezbûr Seyyid Lütfullah Çelebi’yi eşyâ-yı memlükemden bir zümrüd küpe ve bir altın bilezik ve bir orta keçesi ve sekiz saçak bey‘ ve semeni ile bir câriye iştirâ etmek için tarafımdan vekîl nasb ve ta‘yîn edip ol dahi ba‘de kabûlü’l-vekâle zikrolunan eşyâmı elli guruşa bey‘ ve benim mâlım olan elli guruş ile kendi mâlından on guruş dahi emrim ile zam ve ilhâk ve altmış guruşa bir câriye iştirâ edip ba‘dehû câriye-i mezbûreyi iznim ile mezbûr Seyyid Lütfullah Çelebi yetmiş guruşa âhara bey‘ etmişdir. Hâlâ semeni olan yetmiş guruşun on guruşunu emrim ile zam ve ilhâk eylediği on guruş deynim mukābelesinde kabz edip mâ‘adâ altmış guruşu bana teslîme mezbûr Seyyid Lütfullah Çelebi’ye tenbîh olunması murâdımdır dedikde gıbbe’s-suâl mezbûr Seyyid Lütfullah Çelebi câriye-i mezbûreyi yetmiş guruşa bey‘ ve semeninden emriyle mâlımdan zam ve ilhâk eylediğim on guruş mukābelesinde on guruşu kabz edip bâkī altmış guruşdan hatta zimmetinde mütekarrir olan bin akçe mehr-i müeccelinden dahi mezbûre Âişe zimmetimi ibrâ-i âmm-ı kātı‘u’n-nizâ‘la ibrâ ve ıskāt eylemişdir deyü def‘le mukābele edecek gıbbe’l-istintâk ve’l-inkâr mezbûr Seyyid Lütfullah Çelebi’den def‘-i mezbûrunu mübeyyin beyyine taleb olundukda mahalle-i mezbûre sükkânından Ahmed b. Musa el-müezzin ve Halil b. İbrahim ve Mehmed b. Ahmed ve Salih Çelebi b. Mehmed nâm kimesneler li-ecli’ş-şehâde meclis-i şer‘de hâzırûn olup isre’l-istişhâd fi’l-vâki‘ mezbûre Âişe Hatun câriye-i mezbûr semeni olan meblağ-ı mezbûr altmış guruşdan zimmetinde mütekarrir olan bin akçe mehr-i müeccelinden zevci mezbûr Lütfullah Çelebi’nin zimmetini bizim huzûrumuzda ibrâ ve ıskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûre Âişe mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’t-tâsi‘ min-şehr-i Recebi’l-ferd li-sene isneyn ve seb‘în ve elf. Şuhûdü’l-hâl: Ali Çavuş b. ( ), Abdullah b. Muharrem, Şükrullah b. Mustafa, Abdülkadir Efendi el-Burûsî, Keşfî Mustafa Efendi, Kastamonî Mehmed Efendi, Ahmed Efendi b. Hanefî.