İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 109 Hüküm no: 18 Orijinal metin no: [1b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın Yenibahçe’de Sinanpaşa mahallesindeki evini Ahmed Çelebi b. Mustafa’ya sattığı Mahmiye-i İstanbul’da Yenibahçe kurbünde Sinanpaşa mahallesinden Emine bt. Abdullah nâm hatun meclis-i şer‘de işbu râfi‘u’l-kitâb Ahmed Çelebi b. Mustafa mahzarında tâyi‘an ikrâr ve takrîr-i kelâm edip akd-i âtî sudûruna değin silk-i mülkümde olup mahalle-i mezbûrede vâki‘ bir tarafdan ba‘zan Âişe Hatun mülküne ve ba‘zan Saraylı Âişe Hatun mülküne ve bir tarafdan Karayazıcı oğlu Ahmed Çelebi mülküne ve bir tarafdan Medîne-i münevvere Vakfı’na ve bir tarafdan tarîk-i hâs ile mahdûd iki bâb tahtânî oda ve bir sofa-i süfliyeyi ve bir bâb fevkānî oda ve su kuyusunu ve eşcâr-ı müsmireyi hâvî havluyu müştemil olan cemî‘ menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık râyicü’l-vakt on yedi bin akçeye mezbûr Ahmed Çelebi’ye bâtten bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr on yedi bin akçeyi mezbûr Ahmed Çelebi yedinden tamamen alıp kabz eyledim dedikde gıbbe’t-tasdîkı’ş-şer‘i mâ-vaka‘a bi’t-taleb ketb olundu. Fi’s-sânî aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Efendi b. Abdüllgani el-imâm, Abdullah Efendi b. Mehmed el-imâm, Ahmed Çelebi el-müezzin, Yusuf Çelebi b. Abdullah, Mehmed Çelebi b. İsmail, Ramazan Çelebi b. Süleyman, İsmail Beşe er-râcil, Yusuf (…).