İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 118 Hüküm no: 31 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamlı Mehmed Çelebi’nin satması için verdiği maldan Süleyman Çelebi’de olan alacağı Tüccâr tâifesinden hâfızü’l-vesîka Şâmî Mehmed Çelebi meclis-i şer‘-i şerîfe tâife-i merkūmeden Süleyman Çelebi mahzarında üzerine da‘vâ ve takrîr-i kelâm edip târih-i kitâbdan altı sene mukaddem İstanbul’da bey‘ ve semenlerini bana îsâl ve teslîme mezbûr Süleyman Çelebi’yi vekîl ve bi’d-defa‘ât Şâm-ı şerîf’den beynimizde cins ve adedi ilm-i şer‘î ile ma‘lûm on iki yük Şam kumaşı irsâl eylediğimde mezbûr dahi ba‘de’l-karz bey‘ ve semenlerinin bir mikdârı kabz eylediğimden sonra mezbûr Süleyman Çelebi ile hesâbı gördüğümde sâbıkā Beyrut kādısı olup müflis olan Abdülhak nâm kadıya bey‘ ve teslîm eylediği kumaş ile kendi mesârifine sarf eylediği kumaş semenleri zimmetinde bin beş yüz yetmiş riyâlî guruş hakkım zuhûr edip meblağ-ı mezbûru âcilen edâya kudreti olmayıp taksît taleb etmekle ayda yüz guruş vermek üzere bin yüz riyâlî guruşu târih-i kitâbdan yedi ay mukaddem taksît ol dahi kabûl eyledikden sonra üç yüz elli riyâlî guruşunu yedinden kabz edip bâkī kalan yedi yüz elli riyâlî guruşunu taksît olunduğu üzere dört yüz yetmiş riyâlî guruşunu hâlâ mezbûrdan taleb ederim suâl olunsun dedikde gıbbe’s-suâl mezbûr Mehmed Çelebi cevâbında fi’l-vâki‘ ba‘de küllî hesâb mezbûr Mehmed Çelebi’nin zimmetinde vech-i muharrer-i mukassat bin yüz riyâlî guruş ile gayri mukassat dört yüz yetmiş riyâlî guruş ki cem‘an bin beş yüz yetmiş riyâlî guruş hakkı zuhûr edip meblağ-ı mezbûrun üç yüz elli riyâlî guruşunu yedinden kabz edip bin iki yüz riyâlî guruş hakkı bâkī kalmışdır deyü tâyi‘an ikrâr edecek ikrârı mûcebince yedi yüz elli riyâlî guruşunu taksît olunduğu üzere dört yüz yetmiş riyâlî guruşunu âcilen müdde‘î-yi mezbûr Mehmed Çelebi’ye edâ ve teslîme mezbûr Süleyman Çelebi’ye tenbîh olunup mâ-vaka‘a bi’t-taleb ketb olundu. Fi’l-hâmis min-Recebi’l-ferd li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Fahrü’l-müderrisîn Ahîzâde Ahmed Efendi, Abdülkadir Çelebi el-Burûsî, Keşfî Mustafa Efendi el-kâtib, Şükrullah b. Mustafa.