İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 119 Hüküm no: 33 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Osman’ın alacak hususunda İsmail Beşe b. İskender ile sulh olduğu Dergâh-ı âlî yeniçerilerinin on beşinci cemâ‘atine mahsûs oda ahâlîsinden Mustafa Beşe b. Osman meclis-i şer‘-i hatîrde işbu râfi‘u’l-kitâb İsmail Beşe b. İskender muvâcehesinde ikrâr ve takrîr-i kelâm edip mezbûr İsmail Beşe zimmetinde cihet-i deyn-i şer‘îden yüz yirmi kıt‘a riyâlî guruş hakkım olup meblağ-ı mezbûrun elli yedi guruşunu mezbûrun yedinden mukaddemâ ahz u kabz edip hâlâ meblağ-ı bâkī altmış üç guruşu mezbûrdan taleb eylediğimde ol dahi benim ancak altmış guruş deynim olup elli dokuz guruşunu teslîm edip ancak bir guruş bâkī kalmışdır deyü meblağ-ı bâkī[yi] inkâr etmekle beynimizde münâza‘ât-ı kesîre vâkı‘a olmuş idi el-hâletü hâzihî tavassut-ı muslihûn ile meblağ-ı bâkī altmış üç guruş da‘vâsından mezbûr İsmail Beşe benimle kırk kıt‘a riyâlî guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr kırk guruşu mezbûr İsmail Beşe’nin yedinden bi’t-tamam ve’l-kemâl ahz u kabz edip mâ‘adâ da‘vâsından mezbûr İsmail Beşe’nin zimmetini ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’t-tâsi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: Ahmed Çelebi b. Yusuf, Mehmed b. Ramazan, Hasan Çelebi b. Mehmed, Şükrullah b. Mustafa.