İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 119 Hüküm no: 34 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hasan’ın Siyavuş bt. Abdullah’ın elinde bulunan eşyalarının kendisine ait olduğunu şahitlerle ispat ettiği Mahmiye-i İstanbul’da Sarıgörez’de Çıkrıkçı Kemâl mahallesinde sâkine Hadîce bt. Hasan meclis-i şer‘de mahmiye-i mezbûrede Kadıçeşmesi kurbünde Altıpoğaça mahallesinde sâkine Siyavuş bt. Abdullah nâm hatun mahzarında üzerine da‘vâ edip târih-i kitâbdan yirmi dört gün mukaddem Halıcılar Köşkü kürbünde Sıçanlı Hamamı’nda silk-i mülkümde olan işbu meclis-i şer‘de hazır bir al sandala kaplı sırt semmûr kürk ve iki takye ve bir kürevî beyâz sarık ve bir münakkaş boğçam hamam-ı mezbûrun câmekânından zâyi‘ olmuş idi hâlâ eşyâ-i mezkûreyi mezbûre Siyavuş’un yedinde buldum suâl olunup alıverilmek taleb ederin dedikde gıbbe’s-suâl mezbûre Siyavuş cevâbında işbu eşyâyı târih-i mezkûrda hamam-ı mezbûrun camekânından ben ahz eyledim idi deyü ikrâr lâkin eşyâ-i merkūme mezbûrun mülkü olduğu ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden olup Macuncu Sûku kurbünde sâkin Çorbacı Ali ile hamam-ı mezbûrun hamamcısı Kâtibe Hatun bt. Abdullah ve Muazzez bt. Abdullah nâm dellâkeler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ eşyâ-i merkūme müdde‘iye-i mezbûre Hadîce Hatun’un mülküdür biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene isneteyn ve seb‘în ve elf. Şuhûdu’l-hâl: Mehmed Çelebi b. Mustafa, Ebûbekir Çelebi b. Hacı Mustafa, Receb b. Hasan, Mehmed b. Mustafa, Mehmed Efendi b. ( ), Şükrullah b. Mustafa, Hasan b. Ebîbekir, Abdi Çelebi b. Hüseyin, Mehmed b. Ramazan, Rasûl b. Rıdvan.