İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 129 Hüküm no: 50 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Çelebi’nin Ahmed Ağa b. Sâmi’de olan alacağını tahsil edip zimmetini ibra ettiği Medîne-i İznikmid’de Ruslar [Uruslar] mahallesi sükkânından es-Seyyid Mehmed Çelebi b. ( ) nâm kimesne tarafından meblağ-ı câ’i’z-zikri ahz u kabza vekîl olup Mehmed Çelebi b. İsmail ve Mustafa b. Mehmed nâm kimesneler şehâdetleri ile şer‘an vekâleti sâbite olan Ahmed Ağa b. Mehmed Ağa meclis-i şer‘-i hatîrde işbu râfi‘u’l-kitâb diğer Ahmed Ağa b. Sâmi mahzarında bi’l-vekâle ikrâr ve takrîr-i kelâm edip müvekkilim mezbûr es-Seyyid Mehmed Çelebi’nin merkūm diğer Ahmed Ağa zimmetinde karz-ı şer‘îden olan elli bin akçe hakkını tarafından kabza vekîli olduğum hasebiyle mezbûr diğer Ahmed Ağa yedinden meblağ-ı mezbûru bi’t-tamam ve’l-kemâl alıp kabz eyledim min-ba‘d meblağ-ı mezbûrdan müvekkilim mezbûr es-Seyyid Mehmed Çelebi’nin mezbûr diğer Ahmed Ağa zimmetinde bir akçe ve bir habbe hakkı bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: Kapıcızâde Mehmed Çelebi b. Piyale, Ömer Efendi b. Mehmed, Ramazan Çelebi b. Halil, Abdülhâlik b. Mehmed.