İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 129 Hüküm no: 49 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İskender’in bazı eşyalarını kızı Sâliha bt. İlyas’a hibe edip öldükten sonraki işlemleri için damadı Mustafa b. Mehmed’i vasî tayin ettiği Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Mimar Sinan mahallesinde vâki‘ Bakkalzâde odalarında sâkine Âişe bt. İskender nâm hatunun menziline varıp zeyl-i kitâbda isimleri mastûr olan Müslimîn huzûrunda akd-i meclis-i şer‘-i şerîf eyledikde mezbûre Âişe meclis-i ma‘kūd-ı mezbûrda sadriye kebîre kızı râfi‘atü’l-kitâb Sâliha bt. İlyas nâm hatun mahzarında takrîr-i kelâm edip silk-i mülk-i sahîhimde münselik olan eşyâmdan beş aded yemenî yorgan ve üç aded müsta‘mel beledî döşek ve yedi aded beledî yasdık ve üç aded müsta‘mel minder ve üç aded müsta‘mel Yanbolu kebesi ve iki kırmızı velence ve bir beyâz velense ve bir mâ’î yan kebesi ve bir müsta‘mel Selanik yan keçesi ve dört aded tencere ve on aded sahan ve bir tâbe ve bir bakır sini ve üç aded leğen ve bir güğüm ve bir sagīr tuç havan ve bir maşrapa ve bir saka ve üç aded tas ve bir köhne kaliçe ve bir köhne kilimi kızım mezbûre Sâliha Hatun’a hîbe-i sahîha-i şer‘iye ile hîbe ve temlîk ve teslîm edip ol dahi ittihâb ve kabûl ve kabz ve tesellüm eyledi ba‘de’l-yevm zikrolunan eşyâ-i mezkûre kızım mezbûre Sâliha Hatun’un mülk-i mevhûbudur keyfe mâ teşâ ve tahtâr mutasarrıfe olsun benim alâka ve medhalim kalmadı dedikde gıbbe’t-tasdîkı’ş-şer‘î mezbûre Âişe Hatun meclis-i mezbûrda dâmadı Mustafa Efendi b. Mehmed mahzarında i‘âde-i kelâm edip mezbûr Mustafa Efendi işbu zemzemli kefen ile nakid bin akçeyi hıfz edip yevm-i vefâtımda meblağ-ı mezbûru ıskāt-ı salâtıma ve techîz [ve] tekfînime ve üçüme ve yedime ve sâir mu‘tâdeye harc u sarf eylemeğe mezbûr Mustafa Efendi’yi vasîyy-i muhtâr nasb ü ta‘yîn ve ihtiyâr eyledim dedikde ol dahi vesâyet-i mezbûreyi kabûl ve hizmet-i lâzımesini edâya ta‘ahhüd etmeğin vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. İsa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’t-tâsi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: Ali Efendi b. Mehmed el-imâm, Şaban Efendi b. Mustafa el-imâm, Mustafa Efendi b. Mehmed el-kādî, Abdülbaki Çelebi b. Ebîbekir el-müezzin, İbrahim Çelebi b. Ahmed el-müezzin, el-Hâc Mustafa b. Abdullah.