İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 130 Hüküm no: 52 Orijinal metin no: [5a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Beşe b. Ali’nin satın aldığı ayıplı cariyenin iadesinden Mustafa b. Bayram’dan altmış guruş alacağı olduğu Mahmiye-i İstanbul’da Eğrikapı hâricinde Otakcılar[‘da] sâkin bâ‘isü’l-vesîka Selim Beşe b. Ali nâm kimesne meclis-i şer‘de Mustafa b. Bayram nâm kimesne mahzarında da‘vâ ve takrîr-i kelâm edip târih-i kitâbdan kırk gün mukaddem cemî‘ uyûbdan sâlime olmak üzere her kıt‘ası yedişer dirhem yüz kırk riyâlî guruşa mezbûr Mustafa’dan Rusiyyetü’l-asl Zamâne nâm câriye iştirâ ve kabz ve teslîm-i semen eylediğimden sonra mezbûre Zamâne frengî marazı ile mu‘ayyebe olup ayb-ı kadîm olmağla mukaddemâ merkūm Mustafa’ya reddolundukda semen-i mezkûrun seksen riyâlî guruşunu yedinden alıp kabz edip altmış guruşu zimmetinde kalmış idi hâlâ semen-i bâkī altmış guruşu dahi mezbûrdan taleb ederim suâl olunsun dedikde gıbbe’s-suâl mezbûr Mustafa cevâbında fi’l-hakīka mezbûre Zamâne mu‘ayyebe olup vech-i muharrer üzere bana reddolundukda semen-i mezkûrdan zimmetimde altmış riyâlî guruşu bâkī kalmışdır deyü bi-tav‘ihiikrâr ve i‘tirâf etmeğin i‘tirâfı üzere semen-i bâkī altmış guruşu mezbûr Selim Beşe’ye edâ ve teslîme mezbûr Mustafa’ya tenbîh birle mâ-vaka‘a bi’t-taleb ketb olundu. Fi’t-tâsi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: Ali Bey b. Mustafa, el-Hâc Ahmed b. Mahmud, Abdi b. Hüseyin, Şükrullah b. Mustafa, Hüseyin b. Hamza.