İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 131 Hüküm no: 53 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Abdullah’ın Yanaki v. Dimitri’den alacağı olduğuna dair iddiasını ispat edemediği Mahmiye-i İstanbul’da Sultan Selim kurbünde sâkine acemi oğlanı tâifesinden Mehmed Beşe b. Abdullah mahfil-i kazâda işbu bâ‘iseyi’s-sifr Yanaki v. Dimitri ve dâmadı Yorgi v. Yani nâm zimmîler muvâcehelerinde üzerlerine da‘vâ ve takrîr-i kelâm edip işbu hâzırân bi’l-meclis li-ebeveyn karındaşım Palaş ve kız karındaşı İstanye veledey Yorgi ile üçümüzün mezbûr Yanaki zimmetinde kırk beş bin akçe hakkımız olup mukaddemâ meblağ-ı mezbûrun yirmi iki bin yedi yüz yetmiş üç akçesini yedinden ahz u kabz edip meblağ-ı bâkī yirmi iki bin iki yüz yirmi yedi akçe kalmağla târih-i kitâbdan yetmiş gün mukaddem mezbûr Yanaki’den meblağ-ı mezbûr yirmi iki bin iki yüz yirmi yedi akçeyi asâleten ve karındaşlarım mezbûrân Palaş ve İstanye taraflarından vekâleten da‘vâ ve taleb eylediğimde meblağ-ı mezbûru mersûm Yanaki benimle on beş bin akçeye sulh olup meblağ-ı mezbûrun beş bin akçesini mezbûr Yanaki yedinden ahz u kabz edip meblağ-ı bâkī on bin akçeye dâmadı mezbûr Yorgi kefîl bi’l-mâl olmuşdur hâlâ meblağ-ı bâkī-i mezbûru mezbûr Yanaki’den taleb ederin suâl olunsun dedikde gıbbe’s-suâl mezbûr Yanaki cevâbında kazıyye minvâl-i meşrûh üzere olduğunu ikrâr lâkin meblağ-ı bâkī yirmi iki bin iki yüz yirmi yedi akçeyi beş bin beş yüz akçeye müdde‘î-i mezbûr benimle sulh olup bedel-i sulh olan meblağ-ı mezbûr beş bin beş yüz akçeyi asâleten ve vekâleten ahz u kabz eyledikden sonra meblağ-ı bâkī on altı bin yedi yüz yirmi yedi akçe da‘vâsından benim zimmetimi ve kefâletden dâmadım mezbûr Yorgi’nin zimmetini ibrâ ve ıskāt eylemişdir deyü def‘le mukābele edecek gıbbe’l-istintâk ve’l-inkâr mezbûr Yanaki’den def‘-i mezbûrunu mübeyyine beyyine taleb olundukda mahmiye-i merkūmede Yakub Ağa mahallesinde sâkin Mustafa Beşe b. Osman ve Hasan Beşe b. Bayram ve hurdacılar içinde sâkin Hasan Baba b. Abdullah nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ târih-i mezbûrda meblağ-ı bâkī yirmi iki bin iki yüz yirmi yedi akçeyi beş bin beş yüz akçeye müdde‘î-i mezbûr Mehmed Beşe mezbûr Yanaki ile huzûrumuzda sulh olup bedel-i sulh olan meblağ-ı mezbûru yedinden tamamen asâleten ve vekâleten ahz u kabz eyledikden sonra meblağ-ı bâkī on altı bin yedi yüz yirmi yedi akçe da‘vâsından mezbûrun zimmetini ibrâ ve kefâletden dahi dâmadı mezbûr Yorgi’yi ihrâc eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince müdde‘î-i mezbûr bî-vech mu‘ârazadan men‘ birle mâ-vaka‘a bi’t-taleb ketb olundu. Fi’s-sâdis min-Recebi’l-ferd li-sene isneyn ve seb‘în ve elf. Şuhûdu’l-hâl: Mustafa Çavuş b. Abdullah el-mübâşir, Hasan b. Abdullah, Abdi Çelebi b. Hüseyin, Ahmed b. Abdülcabbar, Şükrullah b. Mustafa, Rasûl b. Rıdvan.