İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 132 Hüküm no: 54 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Hatice bt. Abdullah’ın cariye Siyavuş tarafından kuşağının çalındığına dair iddiasını ispat edemediği Mahmiye-i İstanbul’da Monla Gürânî mahallesindesâkine Saraylı Hadîce bt. Abdullah nâm hatun meclis-i şer‘de mahmiye-i mezbûrede Kadıçeşmesi kurbünde Altıpoğaça mahallesinde sâkin işbu râfi‘u’l-kitâb Pehlivan Osman Beşe b. İbrahim mahzarında üzerine da‘vâ ve takrîr-i kelâm edip mezbûrun câriye-i mu‘takası Siyavuş bt. Abdullah mahmiye-i mezbûrede Halıcılar Köşkü kurbünde vâki‘ Sıçanlı Hamamı’nda târih-i kitâbdan dört ay mukaddem elli beş paftalı bir sîm kabare kuşağımı hufyeten ahz edip ağası mezbûr Pehlivan’a def‘ ü teslîm eylemişdir suâl olunup alıverilmek murâdımdır dedikde gıbbe’s-suâl ve’l-inkâr ve akībe’l-istişhâd müdde‘iye-i mezbûre ityân-ı beyyineden izhâr-ı acz edip istihlâf etmeğin müdde‘iye-i mezbûrenin zikrolunan kuşağını câriye-i mu‘takası mezbûre Siyavuş yedinden ahz u kabz etmediğine yemîn teklîf olundukda ol dahi alâ-mâ hüve’l-mesûl billâhi’l-aliyyü’l-azîm etmeğin bilâ-beyyine mu‘ârazadan müdde‘iye-i mezbûre men‘ birle mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene isneyn ve seb‘în ve elf. Şuhûdu’l-hâl: Mehmed Çelebi b. Mustafa, Ebûbekir Çelebi b. Hacı, Hasan b. Hasan, Mehmed b. Mustafa, Mehmed Efendi b. Ali, Abdullah b. ( ).