İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 133 Hüküm no: 56 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Mehmed’in kocası Lütfullah Çelebi b. Mustafa’ya aleyhine açtığı rüşvet davasında iddiasını ispat edemediği Mahmiye-i İstanbul’da Cafer Subaşı mahallesinden Âişe bt. el-Hâc Mehmed meclis-i şer‘de zevci işbu bâ‘isü’r-rakīm Lütfullah Çelebi b. Mustafa mahzarında üzerine takrîr-i da‘vâ edip mezbûr Seyyid Lütfullah Çelebi’ye mukaddemâ nefsimi tezvîc murâd eylediğimde mezbûr Seyyid Lütfullah eğer bana otuz guruş rüşvet verırsen seni tezvîc eyleyem dedikde ben dahi bi-tarîkı’r-rüşve otuz guruş vermiş idim mezbûrdan suâl olunup meblağ-ı mezbûru istirdâd ederim dedikde gıbbe’s-suâl mezbûr Seyyid Lütfullah tezvîci ikrâr lâkin bi-tarîkı’r-rüşve otuz guruş kabzını inkâr edicek müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ mezbûre Âişe’den tezevvüc etmek için bi-tarîkı’r-rüşve otuz guruş ahz u kabz etmeyip üzerine reddi lâzım olmadığına mezbûr Seyyid Lütfullah Çelebi’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’s-sâbi‘ min-Recebi’l-ferd li-sene isneyn ve seb‘în ve elf. Şuhûdu’l-hâl: Ali Çavuş el-mübâşir, es-Sâbıkūn.