İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 134 Hüküm no: 57 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah ve çocukları İbrahim ve Ümmühani’nin tasarruflarında olan vakıf menzilin kullanım hakkını Hacı İsa b. İvaz’a ücreti karşılığında devrettikleri Mahmiye-i İstanbul’da Abdi Subaşı mahallesinde sâkin olup bundan akdem vefât eden el-Hâc Musa b. Abdullah’ın verâseti zevce-i metrûkesi Fâtıma bt. Abdullah ile sulbî sagīr oğlu İbrahim ve sulbiye sagīre kızı Ümmühani’ye münhasıra ve asl-ı meseleleri yirmi sehimden olup sihâm-ı mezbûrenin üç sehmi mezbûre Fâtıma’ya ve on dört sehmi mezbûr İbrahim’e ve yedi sehmi merkūme Ümmühani’ye isâbet ve intikāl eylediği şer‘an zâhir ve müte‘ayyin oldukdan sonra mezbûre Fâtıma tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şer‘iye ile ârifân el-Hâc Bayram b. Davud ve Hüseyin b. Mustafa şehâdetleri ile şer‘an vekâleti sâbite olan İbrahim b. Mustafa nâm kimesne meclis-i şer‘-i hatîrde bâ‘isü’l-vesîka el-Hâc İsa b. İvaz mahzarında bi’l-vekâle ikrâr ve takrîr-i kelâm edip merhûm Mehmed Ağa Vakfı’ndan olup mahalle-i mezbûrede vâki‘ bir tarafdan el-Hâc Ömer nâm kimesne menziline ve bir tarafdan mezbûr Mahmud Ağa câmi‘-i şerîfi müezzinine meşrûta olan menzile ve bir tarafdan câmi‘-i mezbûra ve taraf-ı râbi‘i tarîk-i âmma müntehî iki bâb tahtânî ve bir bâb fevkānî oda ve tahta-pûşu müştemil menzil müteveffâ-yı mezbûr el-Hâc Musa’nın ile’l-vefât icâre-i mu‘accele-i ma‘lûme ve beher şehr altmış akçe müeccel ile taht-ı tasarrufunda olup ba‘de vefâtihî müvekkilem mezbûre Fâtıma ile sagīrân-ı mezbûrâna intikāl ve isâbet eylemiş idi el-hâletü hâzihî müteveffâ-yı mezbûrun düyûn-ı kesîre-i müsbetesi olup menkūl kısmından düyûnuna vefâ eder terekesi olmadığından gayrı sagīrân-ı mezbûrânın nafakaya dahi ihtiyâcları olmağla menzil-i mezbûr sûk-ı sultanîde beyne’t-tâlibîn müzâyede olunup ragabât-ı nâs bi’l-külliye münkatı‘a oldukdan sonra mezbûr el-Hâc İsa üzerinde beş bin beş yüz akçede karâr edip ziyâde ile tâlib-i âhar zuhûr etmemeğin menzil-i mezbûr zarûret-i deyn ve nafaka için müvekkilem mezbûre Fâtıma kendi tarafından asâleten ve sagīrân-ı mezbûrânın kıbel-i şer‘den mansûbe vasîleri olmağla vesâyeten mezbûr el-Hâc İsa’ya bedel-i misli olan meblağ-ı mezbûr beş bin beş yüz akçeye ma‘rifet-i mütevellî ile ferâğ ve tefvîz olduğu vech-i mübeyyen üzere tefevvüz ve kabûl ve bedel-i mezkûr beş bin beş yüz akçeyi asâleten ve vesâyeten mezkûr el-Hâc İsa yedinden tamamen alıp kabz eyledi ba‘de’l-yevm menzil-i mahdûd-ı mezkûr merkūm el-Hâc İsa’nın hakk-ı müfevvazıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Şuhûdu’l-hâl: el-Hâc Ahmed b. Mahmud, Mustafa Efendi b. Muharrem. Hüseyin b. Mustafa, Bayram b. Davud, Abdi b. Hüseyin, Hüseyin ser-bölük.