Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 189 Hüküm no: 177 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İlyas’ın oğlu Safanya’nın İbrahim Bey aleyhindeki alacak iddiasından men olunması Mahmiye-i İstanbul hısnı ebvâbından Balatkapısı hâricinde Karabaş mahallesi ahâlîsinden olup bundan akdem medîne-i Yenişehir’de ticâret üzere iken hâlik olup Tirye cemâ‘atinden olan İlyas v. Safanya? nâm Yahûdinin hasren vârisleri olan sulbî sagīr oğlu Safanya’nın li-ebeveyn ammi ve kıbel-i şer‘den mansûb vasîsi olup hâlik-i mezbûrun zevce-i metrûkesi İlhadya? nâm Yahûdiye tarafından husûs-ı âti’l-beyâna sâbitü’l-vekâle vekîli olan Kalaf nâm Yahûdi meclis-i şer‘-i şerîfde işbu bâ‘isü’l-kitâb İbrahim Bey b. Mehmed nâm kimesne mahzarında üzerine da‘vâ ve takrîr-i kelâm edip hâlik-i mezbûrun terekesinden olup karındaşı ve şerîki hâzır bi’l-meclis İsak nâm Yahûdi yedinde bin iki yüz esedî guruşu mezbûr İbrahim Bey bi-gayr-ı hakkın ahz u kabz etmişdir. Suâl olunup alıvermek matlûbumdur dedikde gıbbe’s-suâl mezbûr İbrahim Bey iki yüz esedî guruşumu hâlik-i mezbûr hayâtında bi-tarîkı’l-mudârebe def‘ ve teslîm, ol dahi yedimden ahz u kabz edip hattâ meblağ-ı mezbûru benden vech-i muharrer üzere kabzını i‘tirâf dahi etdiğinden sonra mücehhelen hâlik olup zimmetine deyn olmağla ben dahi terekesinden mezbûr İsak yedinde olan bin iki yüz esedî guruş cins-i hakkıma tutulup ahz u kabz etmiş idim deyü def‘[le] mukābele edicek gıbbe’s-suâl ve’l-inkâr mezbûr İbrahim Bey’den def‘-i mezbûru mübeyyine beyyine taleb olundukda mahmiye-i mezbûrede Mimârsinan mahallesi sükkânından olan Ebubekir Efendi b. İbrahim nâm kimesne ile hayyât tâifesinden olup mahmiye-i mezbûrda Abdisubaşı mahallesi ahâlîsinden olan Yani v. Linoyo nâm zimmî li-icli’ş-şehâde meclis-i şer‘a hâzırân olup istişhâd olunduklarında fi’l-hakīka hâlik-i mezbûr İlya hayâtında mezbûr İbrahim Bey’den bi-tarîkı’l-mudârebe bin iki yüz guruşu ahz u kabz etdiğini bizim huzûrumuzda ikrâr ve bizi işhâd etmiş idi. meblağ-ı mezbûru mezbûr İlya mücehhelen hâlik olmağla terekesinden edâ lâzımdır deyü bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olup mezbûr İbrahim Bey tahlîf-i şer‘î ile tahlîf olundukdan sonra mûcebince müdde‘î-i mezbûr ber-vech-i mübeyyen üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâbi‘ min-Recebi’l-ferd li-sene ihdâ ve semânîn ve elf min-hicreti men-lehü’l-izzü ve’ş-şeref Şuhûdü’l-hâl: Gazanfer Bey b. Tevekkel, Mehmed b. Ramazan, Mustafa Efendi el-imâm câmi‘-i Davud Paşa, Şükrullah Bey b. Mustafa, Veli Bey b. Mahmud, Mustafa Çelebi b. el-Hâc Ahmed.