Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 189 Hüküm no: 176 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Beşe’nin vefat eden Mustafa Ağa’nın küçük oğulları Mehmed Çelebi ve Abdülbaki Çelebi’den borç alması Mahmiye-i İstanbul’da Muhtesib İskender mahallesi ahâlîsinden Murad Beşe b. Ali meclis-i şer‘-i hatîr-ı kavî[mde] ( ) mahallesi ahâlîsinden olup bundan akdem vefât eden Mustafa Ağa’nın verâseti sulbî sagīr oğulları Mehmed Çelebi b. Abdülbaki Çelebi’ye münhasıra olduğu şer‘an sâbit oldukdan sonra sagīrân-ı mezbûrânın tesviye-i umûrları için savb-ı şer‘-i mergūbdan mansûb vasîleri olup li-ebeveyn karındaşı olan işbu sâhibü’l-kitâb İbrahim Ağa b. Mustafa muvâcehesinde ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Ahmed Çelebi ve bir tarafdan Mehmed Efendi mülkü ve bir tarafdan Kapıcı İbrahim Bey veresesi mülkleri ve bir tarafdan tarîk-i âm ile mahdûd mülk menzilimi vasiyy-i mezbûra bi-tarîkı’l-istiğlâl iki yüz esedî guruşa bey‘ ve teslîm edip ol dahi sagīrân-ı mezbûrânın yedinde olan mâlları ile vech-i muharrer üzere iştirâ ve tesellüm ve kabûl eyledikden sonra semen-i mezbûr iki yüz esedî guruş mukābelesinde vasiyy-i mezbûr bana seksen aded yaldız altını, ben dahi alıp kabûl ve kabz eylediğimden sonra dahi mezbûr menzil-i mezbûru ba‘de’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan üç sene tamâmına değin doksan esedî guruş ücret ile bana îcâr etmekle ben dahi ücret-i mezbûre ile istîcâr eyledim ve bey‘-i mezbûr hakīkatde rehin olduğuna binâen bir sîm pazubend ve bir balık ve yeşil kabzalı hançerimi dahi menzil-i mezbûr ile ma‘an semen-i mezbûr mukābelesinde vasiyy-i mezbûr yedine rehin vaz‘ u teslîm edip ol dahi irtihân ve kabz ve tesellüm eyledi dedikde gıbbe’t-tasdîkı’ş-şer‘î menzil-i mezbûrun derkine ve ücret-i lâzımesine işbu hâzırûn bi’l-meclis el-Hâc Mehmed Efendi b. Mustafa ile medyûn-ı mezbûrun sulbî kebîr oğulları Ahmed Beşe b. Mustafa Beşe nâm kimesneler tarafından emr ü kabûlü hâvî kefâlet ile kefîlân olmağın mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Recebi’l-mürecceb li-sene ihdâ ve semânîn ve elf. Şuhûdü’l-hâl: el-Hâc İbrahim b. ( ), Mustafa Çelebi b. Ahmed, Abdi Çelebi b. Hasan, İbrahim Çelebi b. Ahmed.