İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 147 Hüküm no: 80 Orijinal metin no: [8a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Reis b. Mehmed’in Abdülhalik b. Cemaleddin’e seksen bin akçe borcu olduğunu ikrar ettiği Mellâh tâifesinden Ali Reis b. Mehmed meclis-i şer‘de fahrü’s-sâdât hâfızü’l-vesîka es-Seyyid Abdülhâlik b. es-Seyyid Cemaleddin mahzarında tav‘an ikrâr ve takrîr-i kelâm edip bundan akdem mezbûra karz ve yedinden müşterâ iki sehm hissesi semeninden yüz on altı bin akçe deynimin dokuz bin dört yüz akçesini yedimden kabz edip ve her keyli ellişer akçeye olmak üzere benden iştirâ ve kabz eylediği yüz on iki keyl buğday semeni olan beş bin altı yüz akçe ile her keyli otuz beş akçe olmak üzere iştirâ [ve] kabz eylediği altı yüz keyl buğday semeni olan yirmi bir bin akçe ki cem‘an yirmi altı bin altı yüz akçeyi zimmetimde bâkī kalan yüz elli bin altı yüz [akçe] deynimin irmi altı bin altı yüz akçesine takās eylediğimde mezbûr dahi mukāssa ve kabûl edip mezbûra olan yüz on altı bin akçe deynimin nakid ve semeni cem‘an otuz altı bin akçesini benden alıp mezbûra vâcibü’l-edâ zimmetimde seksen bin akçe deynim bâkī kaldı dedikde gıbbe’t-tasdîk mezbûr Ali Reis’in li-ebeveyn karındaşı Ahmed Beşe meblağ-ı mezbûr seksen bin akçeye emr u kabûlü hâviye kefâletle kefîl olmağın mâ hüve’l-vâki‘ bi’t-taleb ketb olundu. Fi’l-hâmis min-Recebi’l-ferd li-sene isneyn ve seb‘în ve elf. Şuhûdu’l-hâl: es-Sâbıkūn.