İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 148 Hüküm no: 81 Orijinal metin no: [8a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Muslihiddin Ağa’nın Arpaemini mahallesindeki menzilini Ayşe Hanım bt. Vefalı Mehmed Efendi’ye sattığı Sâbıkā sekbânbaşı olup vefât eden Muslihiddin Ağa’nın sulbiye kızı fahrü’l-muhadderât Âişe Hatun tarafından husûs-ı âtîye vekîl olup müşârün-ileyhâyı ma‘rifet-i şer‘iye ile ârifân İmâm Hasan Efendi b. Mahmud ve Müezzin Ali Halîfe b. Mustafa şehâdetleri ile vekâleti sâbite olan Mustafa Çelebi b. Mehmed meclis-i şer‘de hâfizetü’l-kitâb Âişe Hanım bt. Vefalı Mehmed Efendi tarafından husûs-ı câ’îye vekîl olup nehc-i şer‘î-i mu‘teber üzere vekâleti sâbite olan Ali Çelebi b. Abdullah mahzarında vekâleten ikrâr ve takrîr-i kelâm edip müvekkilem müşârün-ileyhâ Âişe Hatun mahmiye-i İstanbul’da Arpaemini mahallesinde vâki‘ bir tarafı Saime Hatun mülküne ve bir tarafı el-Hâc Mustafa mülküne ve bir tarafı ba‘zan Paşmakçızâde ve ba‘zan ( ) mülküne ve bir tarafı tarîk-i âmma müntehî iki bâb fevkānî odayı ve matbahı ve bir bâb tahtânî odayı ve altında odunluğu ve kenîfi ve zât-ı eşcâr-ı müsmire ve gayr-ı müsmireli bahçeyi ve içinde mâ’-i cârî ayazmayı müştemil mülk menzilini tevâbi‘ ve levâhıkı ile müşârün-ileyhâ Âişe Hanım’a elli bir bin akçeye bâtten bey‘ ve teslîm ol dahi minvâl-i muharrer üzere iştirâ ve tesellüm edip semeni olan meblağ-ı mezbûr elli bir bin akçeyi tamamen kabz eyledi min-ba‘d menzil-i mezbûr müşârün-ileyhâ Âişe Hanım’ın mülk-i müşterâsı olup keyfe mâ teşâ mutasarrıfe olsun dedikde gıbbe’t-tasdîk mâ-vaka‘a bi’t-taleb ketb olundu. Fi’r-râbi‘ aşer min-Recebi’l-ferd li-sene isneyn ve seb‘în ve elf. Şuhûdu’l-hâl: Fahrü’l-müderrisîn Mustafa Efendi, Ahmed Efendi el-müderris Âhizâde, Hüseyin Efendi el-Burûsî, Keşfî Mustafa Efendi el-kâtib, Ahmed Çelebi b. Mahmud kethudâ-yı muhzırın.