İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 151 Hüküm no: 86 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah tarafından Osman Beşe’ye satması için teslim edilen çeşitli kumaşların satılmadan önce yangında yandığı Mahmiye-i İstanbul’da el-Hâc Muslihüddin mahallesinde sâkin Mustafa b. Abdullah nâm kimesne mahfil-i kazâda Osman Beşe b. İlyas mahzarında üzerine da‘vâ ve takrîr-i kelâm edip her bir topu onar zirâ‘ olan bir top beyâz ve bir top mavi ve bir top güvezî atlasımı âhara bey‘ eyle deyü târih-i kitâbdan üç sene mukaddem mezbûr Osman Beşe’ye teslîm edip ol dahi yedimden kabz ve tesellüm eylemiş idi. Âhara bey‘ etmemeğin hâlâ taleb ederim suâl olunsun dedikde gıbbe’s-suâl mezbûr Osman Beşe cevâbında kazıyye vech-i muharrer üzere olduğunu ikrâr lâkin yedimde iken bin altmış senesi Zilka‘desi’nin on altıncı gününde vâki‘ harîkde min-gayrı te‘ad muhterik oldu deyicek mezbûr Osman Beşe’ye müdde‘î-yi mezbûrun atlasların âhara bey‘ ve bir vechile hıyânet ve te‘addî etmeyip muhterik olduğuna yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene isneyn ve seb‘în ve elf. Şuhûdü’l-hâl: Mahmudzâde Ahmed Efendi el-kâtib, Keşfî Mustafa Efendi el-kâtib, Mehmed Efendi el-kâtib, Ahmed Efendi el-kādî, Şükrullah b. Mustafa, Abdi b. Hüseyin, Veli b. Mahmud, Mehmed b. Ramazan.