İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 151 Hüküm no: 85 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekeci Mehmed Ağa’nın mirasının taksimi Mahmiye-i İstanbul’da Âşık Paşa mahallesinden olup bundan akdem mağzûben katlolunan Terekeci Mehmed Ağa’nın verâseti ve zevce-i metrûkesi Hadîce bt. Abdullah ve li-ebeveyn karındaşı Ahmed Bey b. Yusuf nâm kimesneye münhasıra olduğu şer‘an zâhir ve müte‘ayyin oldukdan sonra mezbûr Ahmed Bey meclis-i şer‘de tereke-i müteveffâ-yı mezbûra vâzı‘u’l-yed olan mezbûre Hadîce tarafından ikrâr-ı âti’z-zikri tasdîka vekîl olup mezbûrenin zâtını ma‘rifet-i şer‘iye ile ârifân Seyyid Lütfullah Efendi b. Seyyid Emrullah ve Müezzin Mustafa Halîfe b. Halil şehâdetleri ile şer‘an vekâleti sâbite olan Sefer Efendi b. Mehmed ile mezbûre Hadice’nin hâlâ zevci olan Hüseyin Bey b. Abdullah mahzarlarında ikrâr ve i‘tirâf edip müteveffâ-yı mezbûrun terekesini mezbûrân kabz etmekle müteveffâ-yı mezbûrun cemî‘ terekesinden dört sehimden üç sehm hisse-i şer‘iyeme isâbet eden iki bin nakd akçe ile bir sîm kılıç ve bir benefş-sâye ferâce ve bir frengî kırmızı atlas ve bir kırmızı sâye çakşır ve bir cedîd sarığı mezkûrân Hüseyin Bey ve Hadîce yedlerinden bi’t-tamam ahz u kabz edip müteveffâ-yı mezbûrun terekesinden bir akçe ve bir habbe hakkım bâkī kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-âşir min-Recebi’l-ferd li-sene isnâ ve seb‘în ve elf. Şuhûdü’l-hâl: el-Hâc Mustafa b. İbrahim, el-Hâc Mahmud, Ali b. Sefer, Ahmed b. Ömer, Abdülkerim, Şükrullah b. Mustafa, Rasûl b. Rıdvan, Abdi b. Hüseyin, Mehmed b. Ramazan.