İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 152 Hüküm no: 88 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali, Mustafa ve Rukiye’nin anneleri Huri’nin kendilerine vasî tayin edilmesi Mahmiye-i İstanbul’da Emir Buhârî mahallesinde sâkin iken bundan akdem fevt olan Hamdullah b. Satılmış nâm kimesnenin sulbî sagīr oğulları Ali ve Mustafa ve sulbiye sagīre kızı Rukiye’nin babalarından intikāl eden emvâllerini hıfz ve ahvâllerini zabtına bir vasî lâzım ve mühim olmağın sıgār-ı mezbûrûnun vâlideleri işbu râfi‘atü’l-vesîka Huri bt. Bektaş nâm hatun her vechile vesâyet uhdesinden gelmeğe kādire olmağın sıgār-ı mezbûrûnun tesviye-i umûrlarına hâkim-i muvakki‘-i sadr-ı kitâb tûbâ-lehû ve hüsnü-meâb hazretleri mezbûre Huri’yi vasî nasb ve ta‘yîn eyledikde ol dahi vesâyet-i mezbûreyi kabûl ve hizmet-i lâzımesini edâya ta‘ahhüd eyledikden sonra mahalle-i mezbûre sükkânından işbu bâ‘isü’l-kitâb Süleyman b. Mustafa nâm kimesneyi vasiye-i mezbûre üzerine nâzır nasb ve ta‘yîn eyledikde ol dahi nezâret-i mezbûreyi ve hizmet-i lâzımesini edâya ta‘ahhüd etmeğin mâ hüve’l-bâkī bi’t-taleb ketb olundu. Fi’l-yevmi’l-hâmis aşer min-şehri Recebi’l-ferd sene [10]72. Şuhûdü’l-hâl: Mehmed b. Hüseyin, Mustafa b. Ebîbekir, Mehmed Çelebi b. İsmail, Mustafa b. Mehmed, Abdi Çelebi b. Hüseyin, Rasûl b. Rıdvan ve gayruhum.