İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 153 Hüküm no: 89 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hüseyin’e vasî tayin edilen Yusuf Beşe b. Abdullah aleyhinde açılan dava Dîvân-ı kāimmakām-ı sadrazamîde ma‘kūd mahfil-i kazâda bundan akdem mahmiye-i İstanbul’da Oruc Gāzi mahallesinde sâkine iken fevt olan Âişe bt. Hüseyin nâm sagīrin li-ümm karındaşı ve hasran vârisesi Fâtıma bt. İbrahim meclis-i mezbûrda müteveffât-ı mezbûrenin hâl-i hayatında kıbel-i şer‘den mansûb vasîsi olan işbu bâ‘isü’r-rakīm Yusuf Beşe b. Abdullah mahzarında üzerine takrîr [ve] da‘vâ edip mezbûr Yusuf mûrisim müteveffât-ı mezbûrenin kıbel-i şer‘den mansûb vasîsi olmağla İstanbul Ağası Ramazan Ağa zimmetinde mal-ı mezbûrdan güzeşte on bin akçeyi mezbûr Yusuf Beşe vesâyeten kabz ve kendi mesârifine sarf edip hatta bin yetmiş senesinde mahmiye-i mezbûrede hâkim-i şerî‘at-i garrâ olan merhûm Sadreddinzâde Ruhullah Efendi huzûrunda vech-i muharrer üzere kabzını <> ikrâr ve yedime hüccet-i şer‘iye verilmişdir deyü târih-i mezbûr ile müverraha ve merhûm-ı mezbûrun imzâsıyla mümzât hüccet-i şer‘iye ibrâz edip mezbûr Yusuf Beşe muvâcehesinde feth ve kırâet ve istintâk olundukda mezbûr Yusuf Beşe merkūm Ramazan Ağa’dan meblağ-ı mesfûru kabzını ve mazmûn-ı hüccet-i mezbûreyi bi’l-külliye inkâr edicek müdde‘iye-i mezbûreden müdde‘âsına mübeyyin beyyine taleb olundukda beyyineden izhâr-ı acz edip istihlâf etmeğin fi’l-vâki‘ Ramazan Ağa’dan meblağ-ı mezbûru ahz u kabz ve ba‘dehû merhûm-ı mezbûr Ruhullah Efendi’nin hayatında huzûrunda ikrâr dahi etmeyip üzerine edâsı lâzım olmadığına mezbûr Yusuf Beşe’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebiyle bilâ-beyyine mu‘ârazadan mezbûre Fâtıma men‘ birle mâ-vaka‘a bi’t-taleb ketb olundu. ( ) min-şehri Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Ağa muhzırbaşı, Rasûl b. Ramazan, Ali Ağa b. Oruc, Mehmed b. Ramazan.