İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 155 Hüküm no: 91 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kortoş v. Yani’nin Yeniçeri odabaşılarından Osman b. Lütfullah’tan aldığı borç parayı ödediği Dergâh-ı âlî dâme merci‘an li’l-e‘âlî yeniçerilerinin yirmi sekizinci cemâ‘atine mahsûs odada odabaşı iken bundan akdem vefât eden Osman b. Lütfullah’ın li-ebeveyn kız karındaşı ve hasran verâseti Âişe nâm hatun mahfil-i kazâda işbu bâ‘isü’s-sifr Kortoş v. Yani nâm zimmî muvâcehesinde üzerine da‘vâ ve takrîr-i kelâm edip mezkûr Kortoş karındaşım Osman Beşe’den üç bin altı yüz akçe istikrâz ve tesellüm edip mukābelesinde mezbûr Osman Beşe yedine bir sîm balta rehin vaz‘ ve teslîm edip meblağ-ı mezbûru kable’l-ahz karındaşım mezbûr Osman Beşe vefât etmekle meblağ-ı mezbûr ırsen bana intikāl etmiş idi. Hâlâ meblağ-ı mezbûrdan iki bin akçesini yedinden ahz u kabz edip rehn-i mezkûru yedine teslîm eyledikden sonra meblağ-ı bâkī bin altı yüz akçe zimmetinde kalmış idi. Hâlâ verâsetim hasebiyle meblağ-ı bâkī bin altı yüz akçeyi mezbûr Kortoş’dan taleb ederin suâl olunsun dedikde gıbbe’s-suâl mezbûr Kortoş cevâbında rihân-ı mezbûreyi kabz eylediğini ikrâr lâkin müteveffâ-yı mezbûrun hayatında ancak yedinden iki bin akçe istikrâz edip onu dahi i‘tirâfı mûcebince yedine teslîm eyledim deyü ziyâde bin altı yüz akçe ahzını inkâr edicek müdde‘iye-i mezbûreden müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘iye-i mezbûrenin mûrisi müteveffât-ı mezbûr Osman Odabaşı’nın hayatında yedinden kabzına i‘tirâf eylediği iki bin akçeden ziyâde bin altı yüz akçe dahi istikrâz ve kabz etmediğine mezbûr Kortoş’a yemîn teklîf olundukda ol dahi alâ-vefki’l-mesûl yemînü billâhillezî enzele âlihe’l-İncile alâ-İsa aleyhi’s-selâm etmeğin mûcebince müdde‘iye-i mezbûre bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’r-râbi‘ aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Abdi b. Hüseyin, Şükrullah b. Mustafa, Rasûl b. Rıdvan, Hüseyin b. Mustafa, Pîrî b. Osman, Ebûbekir b. Mehmed.