İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 154 Hüküm no: 90 Orijinal metin no: [9a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Çakırağa mahallesinde Şeyhosman mescidi çevresine yerleşen gayrimüslimlerden mahalle halkının şikayeti Husûs-ı âti’l-beyânın mahâllinde keşf ve tahrîri bâbında fahrü’l-emâsil ve’l-a‘yân Ahmed Çavuş b. Ali yediyle buyruldu-yı şerîf vârid olmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Çakır Ağa mahallesinde vâki‘ Şeyh Osman Efendi Mescid-i şerîfi’ne varıp zeyl-i rakīmde mastûrü’l-esâmî Müslimîn ve sikāt-ı muvahhidîn huzûrunda akd-i meclis-i şer‘-i kavîm eyledikde mahalle-i mezbûre ahâlîsinden Abdullah Efendi b. Siyavuş el-imâm ve Müezzin Ahmed Halîfe b. Hüseyin ve Ebûbekir Efendi b. eş-Şeyh Ali ve Ömer Efendi b. Ali ve Mehmed Beşe b. Hasan ve Musa Çelebi b. Hüseyin ve Nimetullah Çelebi b. Zülfikar ve Ali Çelebi b. Mehmed ve Mehmed Çelebi b. İbrahim ve Abdullah Çelebi b. Hüseyin ve sâirleri meclis-i mezbûrda takrîr-i kelâm edip kadîmü’l-eyyâmdan kefere tâifesinin başka mahalleleri olup bizim mahallemizde kefere sâkin olmuş değil iken işbu mescid-i şerîf kurbünde vâki‘ Receb Çavuş’un mülkü olup içinde Müslimîn ve muvahhidîn sâkin olagelen menzili târih-i kitâbdan yedi sene mukaddem Kapıağası Bosna Hasan Ağa mezbûr Receb Çavuş’dan iştirâ ve odalar binâ vakf eylediği mahalle-i mezbûrede vâki‘ bir tarafı Bezzâsistân Kethudâsı oğlu vakfına ve bir tarafı vakf-ı mezbûrdan olup tasarrufunda olan odaya ve iki tarafı tarîk-i âmma müntehî bir bâb odayı Kabriyel v. Ariton nâm zimmî icâre-i mu‘accele ve mü’eccele-i ma‘lûmesi ile taraf-ı vakfdan istîcâr edip ve yine bir tarafı mezbûr Kabriyel tasarrufunda olan odaya ve bir tarafı mezbûr Hasan Ağa’nın odalarına mürûr edecek tarîka ve bir tarafı vakf-ı mezbûrdan olup ( ) tasarrufunda olan menzilime ve bir tarafı tarîk-i âmma müntehî bir bâb odayı Sergiz nâm zimmî taraf-ı vakfdan icâre-i mu‘accele ve mü’eccele-i ma‘lûmesi ile istîcâr edip ve yine bir tarafı Dülger Bagdasar menziline ve bir tarafı Kaysar menziline ve bir tarafı vakf-ı mezbûrdan olan arsaya ve bir tarafı tarîk-i âmma müntehî bir bâb odayı Torkanime nâm Ermeniye icâre-i mu‘accele ve mü’eccele-i ma‘lûmesi ile taraf-ı vakfdan istîcâr edip ve yine bir tarafı Sinan Çavuş vakfına ve bir tarafı mezbûre Turkanime olan menzile ve bir tarafı vakf-ı mezbûrdan olan arsaya ve bir tarafı tarîk-i âmma müntehî bir bâb odayı icâre-i mu‘accele ve mü’eccele-i ma‘lûmesi ile Bagdasar nâm Ermeni taraf-ı vakfdan istîcâr edip ve yine bir tarafı Sinan Çavuş vakfına ve bir tarafı Mehmed Beşe menziline ve bir tarafı Canfeda menziline ve iki tarafı tarîk-i âmma müntehî menzili mâlikesi Âişe nâm hatundan Sergiz veledi Zekerye nâm zimmî semen-i ma‘lûme iştirâ etmişdir. Ve Alacamescid vakfından olup bir tarafı Enserci Karagöz menziline bir tarafı Kurd Bey menziline ve iki tarafı tarîk-i âmma müntehî odayı Yagob v. Sergiz taraf-ı vakfdan istîcâr edip ve Fâtıma bt. Osman nâm hatun yine mahalle-i mezbûrede vâki‘ bir tarafı Şeyh Abdülkerim Efendi menziline ve bir tarafı Ömer Bey menziline ve bir tarafı Emine Hatun menziline ve bir tarafı tarîk-i âmma müntehî menziline Mıgırdıç nâm zimmîyi ücret ile iskân edip ve bir tarafı Kağıdcı Dilaver Bey menziline ve bir tarafı Medîne-i Münevvere vakfına ve bir tarafı Arab Kethudâ vakfına ve bir tarafı tarîk-i âmma müntehî menzili Bey Ömer Bey’in kadîmü’l-eyyâmdan mülkü iken Kaysar nâm zimmî iştirâ ve sâkin olup bin yetmiş senesi Zilka‘desi’nin on altıncı gününde vâki‘ harîkde cümlesi muhterik oldukda yine mezbûrân tecdîd ve sâkin ve zimmî tâifesine îcâr etmekle taklîl-i cemâ‘ate bâ‘is ve bâdî olduklarından mâ‘adâ içinde olan kefere tâifesi her gece alenen fısk u fücûr ve şurb-i hamr edip sekirleri hâllerinde sâdır olan ef‘âl-i fazîha ve ef‘âl-i şenî‘alarından her birimiz sâkin olduğumuz menzilimizde ibâdet ve tâ‘ât ve tilâvet-i Kur’ân-ı azîmü’ş-şân etmekden kalmakla ve ahvâlimizi hâlâ kāimmakām-ı sadâret-uzmâ ve nâib-i menâb-ı vekâlet-i kübrâ mümehhid-i bünyânü’d-devle vezîr-i rûşen-zamîr İbrahim Paşa hazretlerine i‘lâm eylediğimizde şer‘le fazîletlü İstanbul Efendisi [9b] hazretleri hak üzere göre deyü yedimize buyruldu-yı şerîf vermişdir deyü mazmûnu takrîrlerine muvâfık buyruldu-yı şerîf ibrâz eylediklerinde imtisâ[len] leh mahalle-i mezbûreye karîb mahallât ahâlîsinden olup husûs-ı mesfûra vukūfu olan bî-garaz Müslimîn ile ol mahalleye varıp mu‘âyene olunup hakīkat-ı hâl istihbâr ve suâl olundukda kadîmden işbu oda ve menâzilde Müslimîn sâkin olagelmişdir deyü âhar mahallât ahâlîsinden olup zeyl-i rakīmde esâmîleri mastûr sikāt-ı Müslimîn alâ-tarîkı’l-işhâd ihbâ[r] etdiklerinde vâki‘ hâli Mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’s-sâlis aşer min-Recebi’l-ferd li-sene isneyn ve seb‘în ve elf. Şuhûdü’l-hâl. Hasan Efendi el-imâm, İbrahim Çelebi el-müezzin, Abdülkerim Çelebi el-imâm, İbrahim Çelebi el-kayyum, el-Hâc Abdülvehhab b. ( ), Mehmed Efendi b. eş-Şeyh Ali, Mehmed b. Hasan.