İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 156 Hüküm no: 93 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı’da Çoban Çavuşbaşı vakfına ait ekmek fırınını kiralayan Bogaz’dan kira bedelinin alınması Mahmiye-i İstanbul’da vâki‘ Çoban Çavuşbaşı vakfının bi’l-fi‘il mütevellîsi olan işbu râfi‘u’l-kitâb Mehmed Efendi b. Osman meclis-i şer‘de Bogaz v. Sahak nâm Ermeni muvâcehesinde bi’t-tevliye üzerine da‘vâ ve takrîr-i kelâm edip vakf-ı mezbûr müsakkafâtından olup mahmiye-i mezbûrede Nişancı Paşa kurbünde vâki‘ ekmekçi furunu târih-i kitâbdan on ay mukaddem beher şehr yedişer yüz akçeye tevliyetim hasebiyle mezbûr Bogaz’a îcâr ve teslîm ol dahi vech-i muharrer üzere istîcâr ve tesellüm edip hâlâ on iki ayda müctemi‘ olan yedi bin akçeyi edâdan imtinâ‘ eder suâl olunup vakfı’çün alıverilmek matlûbumdur dedikde gıbbe’s-suâl mezbûr Bogaz cevâbında kazıyye bâlâda tafsîli mürûr eylediği vech üzere olduğunu bi’t-tav‘i’s-sâf ikrâr ve i‘tirâf edecek mûcebiyle meblağ-ı mezbûru mütevellî-yi mezbûra edâ ve teslîme mezbûr Bogaz’a tenbîh birle mâ-vaka‘a bi’t-taleb ketb olundu. Fi’l-hâmis aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Ahmed Çelebi b. Yusuf, Abdi b. Hüseyin, Şükrullah b. Mustafa, Veli b. Mahmud.