İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 171 Hüküm no: 112 Orijinal metin no: [11b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kimsesiz Mustafa isimli çocuğun bakımının İbrahim Bölükbaşı tarafından üstlenilmesi Tebennî. Tâife-i muhzırândan hâfızü’l-vesîka İbrahim Bölükbaşı meclis-i şer‘de takrîr-i kelâm edip işbu hazır bi’l-meclis ve tahmînen dört yaşında olan Mustafa nâm sagīri bulup zâhirde velîsi olmamağla tebennî ve terbiye için bana teslîm ve alâ-men-lehü hakku’t-taleb nafaka-i nakdiye olunması matlûbumdur dedikde fi’l-vâki‘ sagīr-i mezbûrun ekārib ve evliyâsından üzerine şer‘an infâkı lâzım olup kimesne bulunmamağın hâkim-i muvakki‘-i sadr-ı kitâb tûbâ-lehû ve hüsnü-meâb hazretleri velâyet-i âmmesi hasebiyle ol sagīri mezbûra teslîm mezbûr dahi terbiye ve tebennî için teslîm eyledikden sonra nafaka ve kisve ve sâir levâzım-ı zarûriyesi için kadr-ı ma‘rûf yevmî dört akçe nafaka takdîr edip vakt-i zarûretde istidâne ve sagīr-i mezbûra sarfa ve ba‘dehû hakk-ı talebi kimesneye rücû‘a izin verilip mâ hüve’l-vâki‘ bi’t-taleb ketb olundu. Fî 29 min-Recebi’l-ferd li-sene isneyn ve seb‘în ve elf. Şuhûdü’l-hâl: es-Sâbıkūn