İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 172 Hüküm no: 114 Orijinal metin no: [11b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesli Hatun’a ait evin kiralama yoluyla Habibe Halime vakfı mütevellisi Mustafa Beşe’ye satıldığı Mahmiye-i İstanbul’da Karabaş mahallesinde sâkine Nesli Hatun bt. Mehmed nâm hatun meclis-i şer‘-i hatîr-i lâzımü’t-tevkīrde mahmiye-i mezbûrede Habibe Halime vakfına hâlâ mütevellîsi olan Mustafa Beşe b. ( ) mahzarında ikrâr ve takrîr-i kelâm edip mahalle-i mezbûrede vâki‘ bir tarafdan kendi mülküm ve bir tarafdan Ali b. Abdullah mülkü ve bir tarafdan Mustafa b. Abdullah mülkü ve bir tarafdan tarîk-i âmma müntehî büyût-ı müte‘addideyi müştemil olan cemî‘ mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık mütevellî-yi mezbûr Mustafa Beşe’ye otuz üç buçuk esedî guruşa bi-tarîkı’l-istiğlâl bey‘ ve teslîm ol dahi vech-i muharrer üzere iştirâ ve tesellüm eyledikden sonra semen-i mezbûr otuz üç buçuk esedî guruşu mütevellî-yi mezbûr Mustafa Beşe yedinden tamamen ahz u kabz eyledikden sonra menzil-i mahdûd-ı mezkûru târih-i kitâbdan bir sene tamamına değin altı yüz akçeye ba‘de’t-tahliyeti’ş-şer‘iye ve’t-takābuzi’l-mer‘î mütevellî-yi mezbûr Mustafa Beşe’den istîcâr edip ol dahi vech-i muharrer üzere bana îcâr eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam sene [10]72. Şuhûdü’l-hâl: Abd[ullah] Efendi el-imâm, Hasan Efendi el-müezzin, Mehmed b. Hüseyin, Abdi Çelebi b. Hüseyin, Mehmed b. Ramazan, Mehmed b. ( )