İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 175 Hüküm no: 117 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Kumkapı Muhsinehatun mahallesinden Mehmed Ağa’dan karısı ve oğluna intikal eden evin Süleyman Efendi’ye satıldığı Mülknâme. Mahmiye-i İstanbul’da Kumkapı kurbünde Muhsinehatun mahallesinde sâkin iken bundan akdem vefât eden Mehmed Ağa’nın verâseti zevce-i metrûkesi Belkıs Hatun bt. Hamza Ağa’ya ve sulbî kebîr oğlu Salih Çelebi’ye münhasıra olduğu tashîh meselesi sekiz sehimden olup bir sehmi zevcesine ve yedi sehmi oğlu mezbûr Salih Çelebi’ye intikāl ve isâbet eylediği şer‘an zâhir ve mütehakkık oldukdan sonra mezbûr Salih Çelebi kendi cânibinden asâleten ve vâlidesi mezbûre Belkıs tarafından husûs-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân olan Hasan b. Abdullah ve es-Seyyid Mehmed Çelebi b. es-Seyyid Receb şehâdetleri ile şer‘an vekâleti sâbite olan vekâleten meclis-i şer‘de işbu kitâbın sahibi fahrü’l-ashâbi’l-ma‘ârif Süleyman Efendi b. Ahmed mahzarında ikrâr ve takrîr-i kelâm edip Yoros kazâsına tâbi‘ Kanlıcak nâm kasabada vâki‘ bir tarafdan Mahmud Çorbacı mülküne ve bir tarafdan müşteri-yi mezbûr mülküne ve bir tarafdan tarîk-i âmma ve bir tarafdan sâhile müntehî ve mahdûd üç bâb fevkānî oda ve bir bâb tahtânî oda ve bir sofa ve iki dehliz ve iki şehinşehî ve bir çardak ve iki kayık (silik) eşcâr-ı müsmire iki kıt‘a bahçeyi ve bir ahır ve iki su kuyusunu ve kenîfi müştemil olan cemî‘ mülk menzili ile’l-vefât babam ve mûrisim müteveffâ-yı mezkûrun mülkü olup ba‘de vefâtihî sekiz sehimden bir sehmi vâlidem müvekkile-i mezbûre Belkıs Hatun ve yedi sehmi bana ırsen intikāl etmekle el-hâletü hâzihî elân müşâ‘iyet üzere tasarrufumuzda idi. El-hâletü-hâzihî menzil-i mahdûd-ı mezkûru bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık asâlet ve vekâletim hasebiyle yüz bin akçeye müdde‘î-yi mûmâ-ileyh Süleyman Efendi’ye bey‘-ı bâtla bey‘ ol dahi minvâl-i muharrer üzere iştirâ ve kabûl eyledikden sonra semeni olan yüz bin akçeyi asâlet ve vekâletim hasebiyle tamamen yedinden alıp kabz edip mahâllinde mebî‘-i mezkûru kabz ve tesellüm ve tasarrufa mûmâ-ileyh Süleyman Efendi’yi taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: es-Sâbıkūn.