İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 174 Hüküm no: 116 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumkapı Muhsinehatun mahallesinden Abdullah Ağa b. Hamza’nın terekesinin taksimi Mülknâme. Mahmiye-i İstanbul’da Kumkapı kurbünde Muhsinehatun mahallesinde sâkin iken bundan akdem vefât eden Abdullah Ağa b. Hamza’nın verâseti zevce-i metrûkesi Âişe Hatun ibnetü Ali’ye ve sulbiye kebîre kızları Râbia ve Ümmühani ve Belkıs ve li-ebeveyn er karındaşı Mehmed Ağa’ya ve li-ebeveyn kız karındaşları diğer Belkıs ve Sâliha ve Emine’ye münhasıra olduğu ve tashîh meselesi yetmiş iki sehimden olup sihâm-ı mezbûreden dokuzu zevcesi mezbûre Âişe’ye ve on altışar sehmi kızları mezbûrât Râbia ve Ümmühani ve Belkıs’a ve altı sehmi karındaşı mezbûr Mehmed Ağa’ya ve üçer kız karındaşları mezbûrât diğer Belkıs ve Sâliha ve Emine’ye isâbet eylediği şer‘an zâhir oldukdan sonra mezbûr Mehmed Ağa asâleten ve zevcesi mezbûre Âişe ile kızı merkūme Râbia taraflarından husûs-ı câ’i’z-zikre vekîl olup mezbûretânın zâtlarına ma‘rifet-i şer‘iye ile ârifân olan Hasan b. Abdullah ve es-Seyyid Mehmed Çelebi b. es-Seyyid Receb şehâdetleri ile şer‘an vekâleti sâbite olan kızı oğlu Hamza Çelebi b. Mehmed vekâleten ve mezbûre Ümmühani tarafından kezâlik vekîl olup şâhidân-ı mezbûrân şehâdetleri ile şer‘an vekâleti sâbite olan zevci el-Hâc Muslu Ağa b. Şaban vekâleten ve mezbûre Belkıs tarafında kezâlik husûs-ı câ’i’z-zikre vekîl olup şâhidân-ı mezbûrân şehâdetleri ile şer‘an vekâleti sâbite olan zevci el-Hâc Ahmed Ağa b. Hüseyin vekâleten ve mezbûre diğer Belkıs tarafından kezâlik husûsu’z-zikre vekîl olup şâhidân-ı mezbûrân şehâdetleri ile şer‘an vekâleti sâbite olan sadrî oğlu Salih Çelebi b. Mahmud vekâleten ve mezbûretân Sâliha ve Emine taraflarından dahi husûs-ı câ’i’z-zikre vekîl olup şâhidân-ı mezbûrân şehâdetleri ile şer‘an vekâleti sâbite olan Ahmed Efendi b. Himmet vekâleten meclis-i şer‘de işbu kitâbın sahibi dahi ashâbü’l-ma‘ârif Süleyman Efendi b. Mehmed mahzarında her biri takrîr-i kelâm edip Yoros kazâsına tâbi‘ Kanlıcak kasabasında vâki‘ bir tarafdan Mehmed Ağa b. Yusuf mülküne ve bir tarafdan <> Hamamcı Ahmed Ağa mülküne ve bir tarafdan tarîk-i âmma ve bir tarafdan sâhil-i bahra müntehî ve mahdûd üç bâb fevkānî oda ve bir fevkānî köşk ve üç bâb tahtânî oda ve bir matbah ve tahta-pûş ve bir hamam ve bir bahçe ve bir su kuyusu ve bir bahçevân odasını müştemil olan cemî‘ menzil-i mezbûru yüz on bin akçeye bunden akdem asâlet ve vekâleti hasebiyle bâtten mûmâ-ileyh Süleyman Efendi’ye bey‘ ol dahi minvâl-i muharrer üzere iştirâ ve tesellüm eylemiş idi. El-hâletü-hâzihî semen-i mezbûrdan on dokuz bin iki yüz akçesini hıfz edip bâkīsi olan doksan bin sekiz yüz akçesini asâlet ve vekâletimiz hasebiyle mûmâ-ileyh Süleyman Efendi yedinden alıp kabz edip mahâllinde kabz ve tasarrufa mûmâ-ileyh Süleyman Efendi’yi taslît eyledik dediklerinde gıbbe’t-tasdîk mâ-vaka‘a bi’t-taleb ketb olundu. Fi’t-tâsi‘ ve’l-işrîn min-Recebi’l-ferd li-sene isneyn ve seb‘în ve elf. Şuhûdü’l-hâl: İmâm Karaca Mehmed Efendi, Hasan Ağa b. Mustafa, Süleyman Çelebi b. Halil, el-Hâc İsmail b. Mehmed, Hüseyin Çelebi b. Halil, Mustafa Çelebi b. Mehmed, Abdullah Çelebi el-imâm, Derviş Mehmed b. Ahmed.