İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 176 Hüküm no: 119 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi esnafından olup hileli mal üretenlerin tehbih olunduğu Hüccet-i tehbîh. Mahmiye-i İstanbul’da çörekçi tâifesinin kethudâları Veli Çelebi b. Hasan ve yiğitbaşıları Mehmed Çelebi b. Ahmed ve Ömer Bey b. Hamza ve Mehmed Çelebi b. Mahmud ve el-Hâc Ömer b. Ömer ve Üstâd Mahmud b. Ahmed ve Ali Beşe b. Nasuh ve Veli b. Hacı Süleyman ve Halil b. Ahmed ve İlyas b. Abdülkerim ve sâirleri meclis-i şer‘de yine tâife-i mezbûreden Mustafa Beşe b. Yusuf ve Mehmed b. Mehmed ve el-Hâc Derviş ve karındaşı Mehmed nâm kimesneler mahzarlarında her biri üzerlerine takrîr-i kelâm edip mezbûr Mustafa Beşe ve Mehmed ve el-Hâc Derviş ve karındaşı Mehmed işledikleri çöreği dâimâ naks işlediklerinden gayrı bizim re’yimize muhâlefet edip mezbûrûnun ef‘âl ve akvâlinden müte’ellim ve müte’ezzîleriz ba‘de’l-yevm mezbûrûn Mustafa Beşe ve Mehmed ve el-Hâc Derviş ve karındaşı Mehmed nâkıs işlememeğe tenbîh olunmak murâdımızdır dediklerinde mezbûrûnun vech-i muharrer üzere nâkıs işledikleri lede’ş-şer‘ zâhir ve mu‘ayyen olmağın ba‘de’l-yevm nâkıs işlememek üzere mezbûrûna tenbîh olunup mâ-vaka‘a bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Ahmed Çelebi b. Mahmud, Abdi Çelebi b. Hüseyin, Rasûl b. Rıdvan, Mehmed b. Ramazan.