İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 177 Hüküm no: 120 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Yazıcı mahallesinden Havva bt. Durmuş ile Hüseyin Beşe b. Mustafa’nın boşanma davası Hul‘. Mahmiye-i İstanbul’da Yazıcı mahallesinde sâkine Havva bt. Durmuş nâm hatun meclisi şer‘de zevci bâ‘isü’l-kitâb Hüseyin Beşe b. Mustafa mahzarında ikrâr ve takrîr-i kelâm edip zevcim mezbûr Hüseyin Beşe zimmetinde mütekarrir ve ma‘kūdün-aleyh olan dört bin akçe mehr-i mü’eccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere kendi mâlımdan bedel-i hul‘ olmak üzere üç bin nakd-i râyic bi’l-vakt ve bir sof ferâce ve bir köhne kaftan ve bir köhne entâri ve takye ve bir futa vermek üzere zevcim mezbûr Hüseyin Beşe ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allika olan âmme-i da‘vâdan her birimiz âharın zimetini ibrâ ve ıskāt eyledik dedikde gıbbe’t-tasdîk mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam sene [10]72 Şuhûdü’l-hâl: Sefer Efendi b. Receb el-müezzin, Osman Beşe b. Ali, Ahmed Beşe b. el-Hâc Mahmud, Osman Beşe b. Mustafa, Cafer Beşe b. İskender, Ömer Beşe b. Mustafa, Mehmed Beşe Seroda, Şükrullah b. Mustafa.