İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 178 Hüküm no: 122 Orijinal metin no: [12b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Selim Camii yakınında Çukurbostan mahallesinde İbrahim b. Bayram’a ait evin Bayram b. Mehmed’e satılması Mülknâme Mahmiye-i İstanbul’da Azebler mahallesinde sâkin İbrahim b. Bayram meclis-i şer‘de bâ‘isü’r-rakīm Bayram b. Mehmed mahzarında ikrâr ve i‘tirâf edip mahmiye-i mezbûrda Sultan Selim Han Câmi‘-i şerîfi kurbünde Çukurbostan mahallesinde vâki‘ bir tarafı Ali Beşe mülküne ve bir tarafı İbrahim Beşe mülküne ve bir tarafı Âişe Hatun mülküne ve bir tarafı Halime Hatun mülküne müntehî olup arsasının senede merhûm Şeyh Yavsı Efendi vakfına yirmi beş akçe mukāta‘a-i kadîmesi olan bir bâb fevkānî ve bir bâb tahtânî odaları ve cüneyneyi ve kenîfi ve mezbûr Ali Beşe ile müşterek duvarı müştemil menzilde olan ebniye-i memlûkemi bi-cümleti’t-tevâbi‘ ve’l-levâhık mezbûr Bayram bana on sekiz bin akçeye bey‘ ve teslîm ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûr on sekiz bin akçeyi mezbûr Bayram yedinden bi’t-tamam ahz u kabz eyledim ba‘de’l-yevm menzil-i mezbûr merkūm Bayram’ın mülk-i müşterâsıdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Ali Efendi el-imâm, Bayram b. Mustafa, Mustafa b. Hasan, Hüseyin b. ( ), Ali b. Mehmed, Mustafa b. Mehmed, İbrahim b. ( ), Ahmed Bey b. ( ).